Dipesaleme 88 - BIBELE

Thapelo ya motho ya feletsweng ke tshepo

¹ Pesalema ya bara ba Kora. Sefela. Thothokiso e nang le thuto, ya Hemane wa Moesera. E qapetswe motsamaisi wa dibini. Ke ya nakong ya malwetse le matshwenyeho.

² Morena, wena Modimo, ke wena mopholosi wa ka, ke lla ho wena motsheare le bosiu.

³ Thapelo ya ka e ke e fihle ho wena, o sekehele sello sa ka tsebe.

⁴ Moya wa ka o teteditswe ke tse bohloko, bophelo ba ka bo dintshing, dintshing tsa Nqalo ya Bafu.

⁵ Ke se ke balellwa hara ba theohelang lebitleng, ke feletswe ke matla ho hang.

⁶ Ke rapaletse hara bafu, ke jwaloka babolauwa ba robetseng ka lebitleng, bao o seng o sa ba hopole, bao o seng o sa ba thuse ka letsoho la hao.

⁷ O ntheoletse botebong ba lebitla, mohohlong o motshomotsho!

⁸ Kgalefo ya hao e nkimetse, maqhubu wohle a hao a mpupeditse.

⁹ O suthisitse balekane ba ka, wa ba suthisetsa hole le nna, o mphetotse manyala mahlong a bona; ke hlahletswe moo ke sitwang ho tswa,

¹⁰ mahlo a ka a motela ke bohloko. Morena, ke ipiletsa ho wena, ke ipiletsa ho wena ka letsatsi le letsatsi, ke phahamisetsa matsoho a ka ho wena.

¹¹ Na bafu o ka ba etsetsa dimakatso? Na ba shweleng ba ka tsoha, ba o rorisa?

¹² Na mohau wa hao o tla bolelwa, o bolelwe ke ba ka mabitleng, botshepehi ba hao bo tla bolelwa, bo bolelwe ke ba leng timelong?

¹³ Na dimakatso tsa hao di tla tsejwa, di tsejwe ke ba leng lefifing, le ho loka ha hao ho tsejwe, ho tsejwe fatsheng la ba lebetsweng?

¹⁴ Empa nna ke lla ho wena Morena, thapelo ya ka e fihla ho wena e sa le hoseng.

¹⁵ Morena, o ntahletseng na? Keng ha o mpatetse sefahleho sa hao?

¹⁶ Esale ke le madimabe, ke batla ke eshwa, ho tloha botjheng ba ka; ke jere kotlo tsa hao tse tshabehang, ke tsiapane.

¹⁷ Kgalefo ya hao ya nkwela hodimo, ka fediswa ke kotlo tsa hao tse tshosang;

¹⁸ ka matsatsi wohle di mpotapotile, di mpotapotile jwaloka metsi, kaofela ha tsona di nkopetse hare.

¹⁹ O suthisitse metswalle ya ka, le bona balekane ba ka o ba suthisitse, wa ba suthisetsa hole le nna, lefifi e se e le motswalle wa ka.