Dipesaleme 87 - BIBELE

Sione mma ditjhaba

¹ Pesalema ya bara ba Kora. Sefela. Motse wa Modimo o theilwe hodima thaba e halalelang,

² Morena o rata dikgoro tsa Sione, ho feta metlotlwane yohle ya Jakobo.

³ O bolelwa ka tse kgabane, wena motse wa Modimo, ho thwe:

⁴ “Hara ditjhaba tse ntsebang ke bolela tsena: Egepeta le Babilona, Filesitiya le Tire, mmoho le Kushe; ka tsona ho thwe: ‘Motho enwa o tswaletswe Sione.’ ”

⁵ Ka Sione ho thwe: “Batho bohle ke bana ba Sione.” Ya Hodimodimo ke yena ya e tiisitseng.

⁶ Ha Morena a bala ditjhaba, o tla ngola, a re: “Le motho enwa ke ngwana wa Sione.”

⁷ Dibini le dihoba di re: “Bohle re phela ka ho wena.”