Dipesaleme 83 - BIBELE

Modimo a qhale dira tsa hae le tsa Iseraele

¹ Pesalema ya Asafo. Sefela.

² Oho, Modimo, o se ke wa ipha tshwea; se kgutse, Modimo, se kgobe matshwafo.

³ Bona, dira tsa hao di a rora, ba o hloileng ba tsosa mohlahla.

⁴ Ba lohela setjhaba sa hao mano, ba kunuta bao o ba sireleditseng.

⁵ Ba re: “Tloong, re ba fedise, e se hlole e eba setjhaba, bitso la Iseraele le se hlole le hopolwa.”

⁶ Ba rerisana ba le pelonngwe, ba entse selekane ho o lwantsha:

⁷ Baahi ba Edomo le Baishemaele, Bamoabe le Bahagare,

⁸ Bagebale le Baamone le Baamaleke, Bafilesita le baahi ba Tire,

⁹ le ba Asiria ba ikopantse le bona; ba thusana le bana ba Lota.

¹⁰ Ako ba etse jwaloka ba Midiane, o ba etse jwaloka Sisera, le Jabine nokaneng ya Kishone,

¹¹ ba neng ba timele Ene-Dore, ba fetoha moitedi mobung.

¹² Etsa hore marena a bona a tshwane le Orebe le Seebe, mahosana wohle a bona a tshwane le Seba le Salemuna,

¹³ ba neng ba ile ba re: “A re ikgapeleng naha ya Modimo, e be ya rona.”

¹⁴ Oho, Modimo wa ka, ako etse hore ba tshwane le ditlhokwa setsokotsaneng, ba tshwane le mmoko moyeng.

¹⁵ Jwalokaha mollo o tjhesa moru, le hlaha e hotetsa dithaba,

¹⁶ ba lelekise ka sefefo sa hao jwalo, o ba tshose ka sefefo sa kganyapa.

¹⁷ Etsa hore difahleho tsa bona di aparelwe ke dihlong, e le hore ba o batle, wena Morena.

¹⁸ Ba ke ba hlajwe ke dihlong, ba tshohele ruri, ba tlontlolohe, mme ba timele.

¹⁹ Ba tsebe hore ke wena feela Morena, Morena, Ya Hodimodimo ya okametseng lefatshe lohle.