Dipesaleme 78 - BIBELE

Modimo le setjhaba sa hae

¹ Thothokiso ya Asafo, e nang le thuto. Lona tjhaba sa ka, mamelang thuto ya ka, sekehelang dipolelo tsa ka tsebe.

² Molomong wa ka ho tla tswa maele, ke bolele dilotho tsa boholoholo.

³ Tseo re di utlwileng, ra di tseba, e leng tseo re di phetetsweng, ra di phetelwa ke bo-ntata rona.

⁴ Ha re na ho di patela bana ba bona, empa re tla phetela moloko o tlang dithoko tsa Morena, le matla a hae, le dimakatso tseo a di entseng.

⁵ O ile a fa leloko la Jakobo ditemoso, a beela Iseraele Molao; a laela bo-ntata rona ho o tsebisa bana ba bona,

⁶ hore o tle o tsejwe ke meloko e tlang, le ke ba tlang ho tswalwa, bona ba tle ba o phete ba o phetele bana ba bona,

⁷ e le hore le bao ba tle ba tshepe Modimo, ba se ke ba lebala mesebetsi ya Modimo, ba mpe ba boloke melao ya hae.

⁸ Ba se ke ba tshwana le bo-ntata bona, bao e bileng moloko o manganga, moloko wa befetohedi; moloko oo maikutlo a wona a neng a sa tsepama, moloko oo moya wa wona o sa tshepahaleng ho Modimo.

⁹ Bana ba Efraime, leha e ne e le ditsebi ho fula ka diqha, ba na ba baleha mohla letsatsi la ntwa.

¹⁰ Ha ba a ka ba boloka selekane, selekane sa Modimo, ba hana ho tsamaya ka Molao wa hae.

¹¹ Ba lebala diketso tsa hae, ba lebala le dimakatso tsa hae, tseo a ba bontshitseng tsona.

¹² Naheng ya Egepeta, thoteng tsa Sowane, a etsa dimakatso pontsheng, pontsheng ya bo-ntata bona.

¹³ A phatlola lewatle ka lehare, a ba tshedisa, a emisa metsi jwaloka qubu.

¹⁴ Motsheare a ba etella pele ka leru, bosiu bohle ka kganya ya mollo.

¹⁵ A petsola mafika lehwatateng, a ba fa metsi a mangata, metsi a kang a bodiba;

¹⁶ a kollisa melatswana lefikeng, a phallisa metsi jwaloka hoja ke a noka.

¹⁷ Empa ba nna ba eketsa ho mo sitelwa, ba fetohela Ya Hodimodimo, ba mo fetohela ba le naheng e tshehla.

¹⁸ Pelong tsa bona ba leka Modimo, ba batla dijo tseo ba di lakatsang.

¹⁹ Ba hanyetsa Modimo, ba re: “Ebe Modimo a ka hla a tseba ho re lokisetsa dijo lehwatateng moo?

²⁰ Ke nnete, o ile a otla lefika, metsi a phutsalla, le dinokana tsa phorosela; ebe a ka tseba ho re fa bohobe, le ho fepa tjhaba sa hae nama?”

²¹ Yare Morena ha a utlwa a halefa, malakabe a mollo a laima, a laimela ba leloko la Jakobo, kgalefo ya hae ya tlokela Iseraele;

²² hobane ba ne ba sa dumele, ba sa dumele ho Modimo, ba sa tshepe ho pholoswa ke yena.

²³ Yaba o laela maru a mahodimo, o bula menyako ya mahodimo;

²⁴ a ba nesetsa manna e be dijo tsa bona, a ba nea koro ya lehodimo.

²⁵ Motho a ja bohobe ba mangeloi, a ba fa kgora ya dijo.

²⁶ Hodimo sebakeng a fokisa moya, a fokisa moya wa botjhabela, ka matla a hae a tlisa moya wa borwa;

²⁷ a ba nesetsa nama jwalokaha eka ke lerole, le nonyana tse fofang, jwalokaha eka ke hlabathe la lewatle,

²⁸ a di theolela kahara diahelo tsa bona, ho potapota ditente tsa bona,

²⁹ ba eja, ba kgora haholo; a ba fa seo ba neng ba se lakatsa.

³⁰ Yare ba eso kgotsofatse takatso ya bona, ba sa ntse ba entse methamo,

³¹ kgalefo ya Modimo ya ba wela hodimo, a bolaya dikwankwetla tsa bona, bahlankana ba Iseraele a ba rapalatsa, a ba rapalatsa fatshe.

³² Leha ho le jwalo, ba nnile ba mo sitelwa, ba se ke ba dumela dimakatso tsa hae.

³³ Yaba o fedisa matsatsi a bona o a fetola lefeela, lemo tsa bona ya eba tsa matshabeho.

³⁴ Eitse ha Modimo a ba bolaya, ba qala ho mmatla, ba kgutlela ho yena, ba mmatla hape;

³⁵ ba boela ba hopola hore Modimo ke lefika la bona, Modimo Ya Hodimodimo ke molopolli wa bona.

³⁶ Ba ne ba ye ba mo qekise ka melomo ya bona, ba mo thetse ka maleme a bona;

³⁷ athe ba ne ba sa tshepahale, ba sa tshepahale ho yena, ba sa tshepahale selekaneng sa hae.

³⁸ Empa yena, ka ho ba utlwela bohloko, a ba tshwarela molato wa bona, a se ke a ba timetsa; ka makgetlo a kokobetsa kgalefo ya hae, bohale ba hae ba se ke ba tlokoma.

³⁹ A hopola hore ke ba nama le madi, ke moya o ikelang, moya o ke keng wa hlola o kgutla.

⁴⁰ Ke hakae ba ileng ba mo fetohela, ba mo fetohela feelleng, ba mo kgopisa lehwatateng!

⁴¹ Ba nna ba leka Modimo kgafetsa, ba utlwisa Ya Halalelang bohloko, Ya Halalelang wa Iseraele!

⁴² Ba lebala matla a letsoho la hae, le letsatsi leo ka lona a neng a ba lopolle direng tsa bona,

⁴³ ha a ne a etsa dipontsho tsa hae Egepeta, le dimakatso tsa hae naheng ya Sowane.

⁴⁴ A fetola metsi a dinoka tsa bona, a a fetola madi, le a melatswana ya bona, hore ba sitwe ho nwa.

⁴⁵ A ba romela diboba tsa ba loma, le dihohwana tsa ba senyetsa.

⁴⁶ Masimo a bona a a neella seboko, tholwana tsa mosebetsi wa bona, tsa jewa ke ditsie.

⁴⁷ Morara wa bona a o senya ka sefako, le fate tsa bona tsa feiye ka lebabo.

⁴⁸ Dikgomo tsa bona a di bolaya ka sefako, le mehlape ya bona ka letolo.

⁴⁹ A ba futuhela ka kgalefo e tukang, ka bohale, le makwebeta, le ka matshwenyeho; a ba romela mangeloi a timetsang.

⁵⁰ A se ke a kokobetsa kgalefo ya hae, leha e le ho ba phemisa lefu; a ba bolaya ka lefu la sewa.

⁵¹ A bolaya matsibolo wohle a Egepeta, bana ba matswathaka, ba metlotlwane ya Kama.

⁵² Jwale a kganna tjhaba sa hae, a se kganna jwaloka dinku, a se tsamaisa lehwatateng, a se tsamaisa jwaloka mohlape.

⁵³ A ba etella pele ba sireletsehile, tshabo ba se na yona, dira tsa bona tsa kwahelwa ke lewatle.

⁵⁴ A ba fihlisa naheng ya hae, naheng e halalelang, le thabeng eo a ikgapetseng yona, a e hapa ka tsoho la hae le letona.

⁵⁵ A leleka ditjhaba pela bona, a ba sehela moo e tla ba lefa la bona, a ahisa meloko ya Iseraele, a e ahisa metlotlwaneng ya tsona.

⁵⁶ Empa ba leka Modimo Ya Hodimodimo, ba mo leka ka ho mo fetohela, ba se ke ba mamela ditemoso tsa hae;

⁵⁷ ba kweneha, ba hloka botshepehi, ba bo hloka jwaloka bo-ntata bona, ba kgutlalla jwaloka seqha se sa tiyang.

⁵⁸ Ba mo phephetsa ka ho ikahela dibaka tsa borapedi, ba mmakela lefufa ka medimo ya bona, medimo ya bona ya bohata.

⁵⁹ Ha Modimo a bona hoo, a halefa; a lahla Iseraele ho hang.

⁶⁰ Yaba o furalla Leaho la hae la Shilo, e leng tente eo a neng a e hlomile, a e hlomile hara batho.

⁶¹ Areka ya selekane sa hae a e tlohela, a e tlohella ho haptjwa, areka e bonahatsang tlotla ya hae ya wela matsohong a sera.

⁶² A tlohela tjhaba sa hae, a se tlohella ho bolawa ka sabole, a halefela bao e leng lefa la hae.

⁶³ Mollo wa timetsa bahlankana ba bona, barwetsana ba se ke ba binelwa, ba binelwa pina tsa lenyalo.

⁶⁴ Baprista ba bona ba bolawa ka sabole, bahlolohadi ba se ke ba bina, ba bina kodi-ya-malla.

⁶⁵ Jwale Morena a phaphama jwalokaha eka o ne a kgalehile, jwaloka mohale ya neng a tahilwe.

⁶⁶ A otla dira tsa hae dibonong, tsa hlajwa ke dihlong ka ho sa feleng.

⁶⁷ Yaba o lahla motlotlwane wa Josefa, leloko la Efraime a se ke a le kgetha;

⁶⁸ empa a kgetha leloko la Juda, thaba ya Sione eo a e ratang.

⁶⁹ A haha Sehalalelo sa hae a se haha jwaloka leaho la lehodimo, jwaloka lefatshe leo a le theileng, a e theetseng mehla yohle.

⁷⁰ A kgetha Davida, mohlanka wa hae, a mo tlosa masakeng a dinku,

⁷¹ a mo tlohedisa nku tsa ditswetse, a mo disisa leloko la Jakobo, tjhaba sa hae, Iseraele eo e leng lefa la hae.

⁷² Davida a ba disa ka pelo e se nang kodi, a ba tsamaisa ka letsoho le bohlale.