Dipesaleme 77 - BIBELE

Na Modimo o re lahlile?

¹ Pesalema ya Asafo, e qapetsweng motsamaisi wa dibini; ya Jedutune.

² Sello sa ka se nyolohela ho Modimo, ke llela ho yena; sello sa ka se nyolohela ho Modimo, o tla ntshekehela tsebe.

³ Mohla ke neng ke le matshwenyehong ka batla Morena, ka dula ke phahamisitse matsoho, ke a phahamisitse hara bosiu, moya wa ka wa hana ho tshediseha.

⁴ Ka hopola Modimo, ka fehelwa, ka nahana, moya wa ka wa sarelwa.

⁵ O entse hore ke se ke ka bo hlotha, ke tshwenyehile, ke sitwa le ho bua.

⁶ Ke hopola ditshiu tsa kgale, le dilemo tse ileng ke a di hopola.

⁷ Bosiu ke fihlelwa ke pina pelong, ke a nahana, moya wa ka o a balabala:

⁸ “Na Morena o ntahletse ruri, ha a sa tla hlola a kgahlwa ke nna?

⁹ Na mohau wa hae o feletse ruri, ditshepiso tsa hae ha di sa tla phethwa, di phethelwa meloko yohle?

¹⁰ Na Modimo o lebetse ho utlwela bohloko? Na kgalefo ya hae e thibetse rato la hae?”

¹¹ Jwale ke re: “Se ntlhabileng ke sena: Letsoho la Ya Hodimodimo le fetohile.”

¹² Ke hopola mesebetsi ya Morena, e, ke hopola dimakatso tsa hae, dimakatso tsa boholoholo.

¹³ Ke nahana mesebetsi yohle ya hae, ke imamella diketso tsa hae tse kgolo.

¹⁴ Modimo, ditsela tsa hao di a halalela; na modimo o teng o moholo, o moholo jwaloka wena Modimo?

¹⁵ Wena o Modimo ya etsang dimakatso, o bonahaditse matla a hao hara ditjhaba.

¹⁶ Ka tsoho la hao o lopolotse tjhaba sa hao, bana ba Jakobo le ba Josefa.

¹⁷ Metsi a na a o bona, Modimo, metsi a o bona, a tuduana, madiba a tsukutleha.

¹⁸ Maru a nesa pula, mahodimo a thwathwaretsa, mahadima a hao a tsekema kahohle.

¹⁹ Letolo la hao la thwathwaretsa, la thwathwaretsa hara setsokotsane, mahadima a hao a bonesa lefatshe, lefatshe la reketla, la sisinyeha.

²⁰ Tsela ya hao ya tsamaya lewatleng, le tselana tsa hao hara bodiba; empa ha ho ya boneng mohlala wa hao.

²¹ O tsamaisitse setjhaba sa hao, wa se tsamaisa jwaloka mohlape, wa se tsamaisa ka letsoho la Moshe le ka letsoho la Arone.