Dipesaleme 76 - BIBELE

Modimo a tshajwe

¹ Pesalema ya Asafo. Taelo ho motsamaisi wa dibini: E binwe ka diletsa tsa dikgwele. Sefela.

² Modimo o a tsejwa naheng ya Juda, lebitso la hae le leholo Iseraeleng.

³ Motlotlwane wa hae o Salema, leaho la hae le Sione.

⁴ Ke moo a robileng metsu, metsu e bebang ya seqha, le thebe, le sabole, le hlomo tsa ntwa.

⁵ O kganya hakaakang, o tlotleha hakaakang, ha o kgutla dithabeng tsa tlholo!

⁶ Dinatla di hlakotswe kgapo ya tsona, tsa robala boroko ba lefu; bahlabani bohle ba sitilwe ho itwanela.

⁷ Yare ha o kgalemela, wena Modimo wa Jakobo, dikariki le dipere tsa ntwa tsa fetoha, tsa fetoha diemahale.

⁸ Wena, o a tshabeha! Ke mang ya ka emang kapele ho wena, a ema teng ha o halefile?

⁹ O dihile kahlolo o le lehodimong, lefatshe la tshoha, la kgutsa,

¹⁰ ha Modimo a ema ho ahlola bohle, le ho pholosa bohle, bohle ba eisehang ba lefatshe.

¹¹ Kgalefo ya batho e tla o fetohela thoriso, ba phonyohileng kgalefo ya hao ba tla o etsetsa mekete.

¹² Etsang dikano, le di etsetse Morena Modimo wa lona, le be le di phethe; ditjhaba tsohle tse kamathoko di nyehelle Ya Tshajwang,

¹³ yena ya fedisang boikgohomoso, boikgohomoso ba mahosana, yena ya tshajwang ke dikgosi tsa lefatshe.