Dipesaleme 75 - BIBELE

Modimo ke moahlodi

¹ Pesalema ya Asafo. Taelo ho motsamaisi wa dibini: E binwe ka mmino wa sefela sa “O se ke wa senya”. Sefela.

² Re a o boka Modimo, re a o boka, rona ba rapelang lebitso la hao, ba bolelang dimakatso tsa hao.

³ “Ka nako eo ke e beileng,” ho rialo Modimo, “ke nna ya tla ahlola ka ho loka.

⁴ Leha lefatshe le ka thothomela le bohle ba ahileng ho lona, ke nna ya tiisitseng ditshiya tsa lona.

⁵ Ke itse ho baikakasi: ‘Le se ke la ikakasa,’ ho ba kgopo ka re: ‘Le se ke la kgantsha matla;

⁶ le se ke la kgantsha matla hakaalo, kapa la bua le sataladitse melala.’ ”

⁷ Kahlolo ha e tswe botjhabela, kapa ha e tswe bophirimela, leha e le lehwatateng kapa dithabeng.

⁸ Ke Modimo ya ahlolang: O kokobetsa e mong, a phahamise e mong.

⁹ Ka letsohong Morena o tshwere mohope o phophomang veine e lomosehileng. O qhatsetsa bohle ba kgopo ba lefatshe; ba a nwa, ba minyeletsa le maritsa.

¹⁰ Empa nna ke tla mo fapha kamehla, ke roke Modimo wa Jakobo.

¹¹ O tla fedisa matla wohle a ba kgopo, mme ba lokileng ba tla matlafala.