Dipesaleme 73 - BIBELE

Katleho ya ba kgopo ke lefeela

¹ Pesalema ya Asafo. Ruri Modimo o molemo ho Iseraele, e, le ho ba pelo di hlwekileng.

² Empa nna, ke batlile ke kgothometseha, maoto a ka a batlile a thella;

³ hobane ke ne ke honohela baikakasi, ha ke bona katleho ya ba kgopo.

⁴ Bona ha ba na matshwenyeho, mmele ya bona e shahlile, ba nonne.

⁵ Ha ba na dikgathatso jwaloka ba bang, mme ha ba otlwe jwaloka ba bang.

⁶ Ka baka leo, boikgohomoso ke sefaha, ke sefaha melaleng ya bona, sehloho ke seaparo seo ba se apereng.

⁷ Mahlo a bona a rotolohile ke mafura, ka dipelong ba tletse mehopolo ya bowatla.

⁸ Ba a tlaka, mme ba bua tse mpe, ba sokela batho ka boikgantsho.

⁹ Melomo ya bona e nyefola tsa lehodimo, maleme a bona a bebera tsa lefatshe.

¹⁰ Kahoo setjhaba sa ka se ba sala morao, se inyorolla ka metsi a mehopeng ya bona.

¹¹ ba re: “Modimo a ka tseba jwang? Na tsebo e teng ho Ya Hodimodimo?”

¹² Ba kgopo ba jwalo; kamehla ba qhwaolla dikobo, ba ikatisetsa maruo.

¹³ Ho thusang ho hlwekisa pelo ya ka, le ho hlokisa matsoho a ka molato,

¹⁴ ha e le moo ke otlwa ka matsatsi wohle, ke otlwa hoseng ho hong le ho hong?

¹⁵ Hoja nkile ka re: “Ke tla bua jwaloka bona,” nka be ke kgelohile molokong, molokong wa bana ba hao.

¹⁶ Ha ke ntse ke nahanahana, ke nahana hore ke utlwisise tsena, ka fumana e le ntho e thata,

¹⁷ ho fihlela ke ba ke kena Sehalalelong, Sehalalelong sa Modimo, mme ke utlwisisa seo qetello ya ba kgopo e tla ba sona.

¹⁸ Ruri o ba beile moo ho thellang, wa ba dihela hore ba ye timelong;

¹⁹ ba fetoha lesupi ka ho panya ha ntshi, ba fedile, qetello ya bona ke e tshosang.

²⁰ Morena, jwalokaha toro e fela, e fela ha motho a phaphama, le wena ha o tsoha o fedisa seriti sa bona.

²¹ Ha pelo ya ka e ne e utlwile bohloko, mme maikutlo a ka a hlabehile,

²² ka ba lewatla, ka hloka kutlwisiso, ka ba jwaloka phoofolo mahlong a hao.

²³ Empa leha ho le jwalo, ke na le wena kamehla, o ntshwere ka letsoho le letona.

²⁴ O ntsamaisa ka keletso ya hao, mme qetellong o tla nkamohela ka tlotla.

²⁵ Nka ba le mang lehodimong haese wena? Ha ke ena le wena, ha ke sa lakatsa letho lefatsheng.

²⁶ Leha mmele wa ka le pelo ya ka di ka fela, Modimo ke lefika la ka le kabelo ya ka kamehla.

²⁷ Ha e le ba ikarohantseng le wena, bona ba tla timela; o fedisa bohle ba sa tshepahaleng ho wena.

²⁸ Empa ho nna ho ba haufi le Modimo, ke ntho yona e molemo. Ke ikgethetse Morena, Morena wa ka, ho ba setshabelo sa ka, ke tle ke bolele mesebetsi ya hae yohle.