Dipesaleme 68 - BIBELE

Pina ya setjhaba ya tlholo

¹ Pesalema ya Davida, e qapetsweng motsamaisi wa dibini. Sefela.

² Modimo a ke a tsohe, dira tsa hae di qhalane, ba mo hloileng ba mmalehe.

³ Ba nyamele jwalokaha mosi o nyamela, jwalokaha tshotso e qhibidihiswa ke mollo, ba kgopo ba timela jwalo, ba timela jwalo mahlong a Modimo.

⁴ Empa ba lokileng ba a thaba, ba nyakallela Modimo, ba tlale thabo.

⁵ Binelang Modimo, rokang lebitso la hae, lokisang tsela ya ya kaletseng maru. Lebitso la hae ke Morena, nyakallang mahlong a hae.

⁶ Modimo ke ntata dikgutsana, ke mosireletsi wa bahlolohadi, o leahong la hae le halalelang.

⁷ Ba se nang moneketsela, Modimo o ba fa bodulo, o boela o busetsa batshwaruwa boiketlong, athe bahanyetsi ba sala mahalaopeng.

⁸ Modimo, mohla o neng o haola hara lehwatata, o eteletse tjhaba sa hao pele,

⁹ lefatshe la na la reketla, mahodimo a nesa pula mahlong a Modimo, Modimo wa Sinai, Modimo wa Iseraele.

¹⁰ Modimo, wa nesa pula, pula ya ditlwebelele; wa e nesetsa bao e leng lefa la hao, wa ba matlafatsa ha ba ne ba kgathetse,

¹¹ mohlape wa hao wa fumana bodulo teng, boo ka mohau wa hao o bo lokisitseng, wa bo lokisetsa bahlophehi.

¹² Morena a ntsha taelo, letshwele la basadi la tlisa molaetsa o reng:

¹³ “Dikgosi le mabotho a tsona di balehile, di balehetse ruri!” Basadi ba setseng hae ba arola tse hapilweng.

¹⁴ Ha lona le ne le paqame, le paqame marakong a masaka, bona ba ne ba ka maebana a apesitswe ka silefera, ao masiba a wona a phatsimang, a phatsimang sa kgauta e tshehla,

¹⁵ ha Ya Matla wohle a ne a qhalanya dikgosi, lehlwa la kgetheha thabeng ya Salemone.

¹⁶ Thaba ya Bashane ke thaba e telele, thaba ya Bashane ke thaba e makgeka.

¹⁷ Lona dithaba tse makgeka, keng ha le honohela thaba, thaba eo Modimo a kgahlilweng ke yona, ho e etsa leaho la hae, moo Morena a tla aha teng, a ahe teng ka ho sa feleng?

¹⁸ Kariki tsa Modimo tsa ntwa ke kete tsa dikete, ka tsona Morena o tlile Sehalalelong, o tlile Sehalalelong sa hae a etswa Sinai.

¹⁹ O nyolohetse hodimo a nkile bathopuwa, a nyehellwa ka batho, esita le ka bahanyetsi. Morena Modimo a ba le leaho.

²⁰ Ho bokwe Morena ka matsatsi wohle, yena ya re pepang, yena Modimo, mopholosi wa rona.

²¹ Modimo wa rona ke Modimo ya pholosang; Morena ke Morena wa rona, Morena ya re phemisang lefu.

²² Modimo o tla pshatla dihlooho, a pshatle hlooho tsa dira tsa hae, mahata a dihlotho a ba kgopo.

²³ Morena o itse: “Ke tla ba lata Bashane, ke ba late le botebong ba lewatle,

²⁴ leoto la hao le tla hata mading a bona, dintja tsa hao di itjelle nama tsa dira.”

²⁵ Bohle ba bona mekoloko ya hao, Modimo, mekoloko ya Modimo wa ka, kgosi ya ka, mekoloko e kenang Sehalalelong.

²⁶ Kapele ke dibini, kamorao ke baletsi, hare ke thwetsana e tidinyang meropa.

²⁷ Bokang Modimo diphuthehong, bokang Morena dibokeng tsa Iseraele.

²⁸ Benjamine, kgorula, o ba eteletse pele, o latetswe ke hlopha sa mahosana, mahosana a Juda, le mahosana a Sebulone, le mahosana a Nafthali.

²⁹ Oho, Modimo, bontsha matla a hao, ao o re sebeleditseng ka wona.

³⁰ Ka baka la Tempele ya hao, Tempele e Jerusalema, dikgosi di tla o nyehella ka dimpho.

³¹ Kgalema sebatana se moferong, batho ba kang mohlape wa dipoho, le manamane a wona, ba ke ba ineele, ba o tlisetse silefera; qhalanya ditjhaba tse ratang ntwa.

³² Mahosana a tla tswa Egepeta, Kushe e phahamise matsoho, e a phahamisetse ho Modimo.

³³ Binelang Modimo, lona mebuso ya lefatshe, le roke Morena.

³⁴ Ke yena ya kaletseng mahodimo, mahodimo a kgalekgale; o utlwahatsa lentswe la hae, lentswe la hae le matla.

³⁵ Thoholetsang matla a Modimo; ke yena ya renang hodima Iseraele, matla a hae a marung.

³⁶ Modimo o a tshabeha Sehalalelong sa hae. Ke Modimo wa Iseraele, ya matlafatsang setjhaba sa hae haholo. Ho bokwe Modimo!