Dipesaleme 66 - BIBELE

Ditjhaba di boke Modimo

¹ Pesalema e qapetsweng motsamaisi wa dibini. Sefela. Etsetsang Modimo ditlatse, lona ba lefatshe lohle,

² mo rokeng, le tlotlise lebitso la hae, le mo rorise ka mokgwa o tlotlehang.

³ Ereng ho Modimo: “Mesebetsi ya hao e tshabeha hakaakang! Ka baka la matla a hao a maholo, dira tsa hao di a o qekisa.

⁴ Lefatshe lohle le a o kgumamela, le a o roka, le roka lebitso la hao.”

⁵ Tloong, le bohe mesebetsi ya Modimo: O a tshabeha diketsong tsa hae, ketsong tsa hae ho bana ba batho.

⁶ O ile a apola lewatle, ha hlaha mobu o ommeng, batho ba tshela noka ka maoto; ka baka leo, a re mo thabeleng.

⁷ Ka matla a hae o busa kamehla, mahlo a hae a disa ditjhaba, esere bahanyetsi ba boela ba tsoha.

⁸ Bokang Modimo wa rona, lona ditjhaba, utlwahatsang thoriso ya hae.

⁹ Ke yena ya re fileng bophelo, ya sa kang a tlohela maoto a rona, a a tlohella ho thella.

¹⁰ Modimo, o ile wa re hlahloba, wa re hlwekisa seboping jwaloka silefera;

¹¹ wa re tshwasa ka letlowa, wa re belesa mojaro o boima;

¹² wa dumella batho ho re hata melala, ra feta hara mollo le metsi; wa ntano re kgatholla haholo.

¹³ Ke tla ya tlung ya hao ke nkile setjheso, ke o phethele dikano tsa ka,

¹⁴ tseo ke di buileng ka molomo wa ka, ka di bolela ke le matshwenyehong.

¹⁵ Ke tla o nyehella ka ditjheso, ka ditjheso tsa phoofolo tse nonneng, le ka setjheso sa dipheleu, setjheso se monko o monate, ke o hlabele dipohwana le diphooko.

¹⁶ Tloong, le mamele, lona bohle ba tshabang Modimo, ke le phetele seo a nketseditseng sona.

¹⁷ Ke ipileditse ho yena ka molomo wa ka, ka mo phafa ka leleme la ka.

¹⁸ Hoja ke ne ke dumella bobe pelong ya ka, Morena a ka be a sa nkutlwa,

¹⁹ empa Modimo o nkutlwile, o mametse sello sa thapelo ya ka.

²⁰ Ho bokwe Modimo, ya sa kang a lahla thapelo ya ka, ya sa kang a ntima mohau wa hae.