Dipesaleme 63 - BIBELE

Ho hlolohelwa Modimo

¹ Pesalema ya Davida, ya mohla a leng lehwatateng la Juda.

² Modimo, ke wena Modimo wa ka, Modimo eo ke mmatlang, moya wa ka o o nyoretswe, mmele wa ka o o hlolohetswe, jwaloka naha e omeletseng, e kgathetseng, e hlokang metsi.

³ Ka o tadima o le Sehalalelong sa hao, ka boha matla a hao le tlotla ya hao.

⁴ Mohau wa hao o molemo ho feta bophelo, molomo wa ka o tla o rorisa.

⁵ Ke tla o boka ha ke ntse ke phela, ke phahamise matsoho a ka, ke a phahamisetse ho wena.

⁶ Moya wa ka o tla kgora jwaloka ya jang moko le mafura, molomo wa ka o o rorise o o rorise ka dithoko tsa thabo.

⁷ Ha ke ntse ke robetse ke a o hopola, ke o nahana ka dinako tsa bosiu,

⁸ hobane o mothusi wa ka, ke nyakalla moriting wa mapheo a hao.

⁹ Moya wa ka o o kgomaretse, tsoho la hao le letona le a ntshehetsa.

¹⁰ Ba batlang ho timetsa bophelo ba ka ba tla theohela botebong ba lefatshe;

¹¹ ba tla bolawa ka sabole e bohale, mme ba jewe ke diphiri.

¹² Athe kgosi e tla thabela Modimo, bohle ba ikanang ka yena ba tla ithorisa, empa ba leshano ba tla thijwa melomo.