Dipesaleme 62 - BIBELE

Ke tshepa Modimo feela

¹ Pesalema ya Davida, e qapetsweng motsamaisi wa dibini; ya Jedutune.

² Ke ho Modimo feela moo moya wa ka o ka phomolang, pholoho ya ka e tswa ho yena.

³ Ke yena feela lefika la ka, ke yena feela pholoho ya ka; ke qhobosheane ya ka, nke ke ka sisinyeha.

⁴ Lona bohle, le tla nne le pheelle ho rusolla motho ho fihlela neng, leha a se a le jwaloka lerako, rako le hlephileng, le motero o nyehlileng?

⁵ Ruri ba rera ho mo diha boemong ba hae bo phahameng, ba thabela leshano. Ka melomo ba hlohonolofatsa motho, empa ka dipelong ba a mo rohaka.

⁶ Moya wa ka o phomola ho Modimo feela, hobane tshepo ya ka e tswa ho yena.

⁷ Ke yena feela lefika la ka le pholoho ya ka; ke qhobosheane ya ka, nke ke ka sisinyeha.

⁸ Pholoho ya ka e tswa ho Modimo, le tlotla ya ka e tswa ho yena, ke yena lefika la ka le matla; Modimo ke setshabelo sa ka.

⁹ Mo tshepeng ka dinako tsohle, mo tshepeng lona tjhaba sa heso, mmuleleng difuba tsa lona. Modimo ke setshabelo sa rona.

¹⁰ Bafo ke lefeela, marena ke thetso; sekaleng ba bobebe, kaofela ha bona ke lefeela.

¹¹ Se tshepeng ho hanyapetsa batho, se ithetseng ka ho ikgapela maruo, ka ho ikgapela maruo a ba bang; leha maruo a lona a ka eketseha, se beeng pelo tsa lona ho wona.

¹² Modimo o buile hanngwe, nna ka utlwa tsena tse pedi: Matla ke a Modimo,

¹³ ke mohau ke wa hao, Morena; ke wena ya putsang motho, ho ya ka diketso tsa hae.