Dipesaleme 60 - BIBELE

Setjhaba se kopa thuso ntweng

¹ Pesalema ya Davida, e nang le thuto. Taelo ho motsamaisi wa dibini: E binwe ka mmino wa sefela sa “Mohaladitwe wa bopaki”.

² Ke ya mohla Davida a neng a lwana le Baarame ba Naharaime le ba Soba, ha Joabe a kgutlela ho ya hlola Baedomo ba kete tse leshome le metso e mmedi Kgohlong ya Letswai.

³ Modimo, o re lahlile, o re ripitlile; o ne o halefile, empa jwale ako kgutle, o kgutlele ho rona.

⁴ O reketlisitse lefatshe, wa le petsola; ako thibe mapatso a lona, hobane le a qhehemana.

⁵ O bontshitse tjhaba sa hao bothata, O re nwesitse jwala bo re tsekedisang.

⁶ O mokgele ho ba o tshabang, hore ba phonyohe metsu ya sera,

⁷ baratuwa ba hao ba tle ba lopollwe. Re pholose ka letsoho la hao le letona, re pholose, o be o re utlwe.

⁸ Modimo o buile a le Sehalalelong sa hae, o buile a le ho sona, a re: “Ke nyakaletse, ke tla arola Shekeme, ke sehe kgohlo ya Sukote dikoto.

⁹ Gileade ke ya ka, le Manase ke ya ka, Efraime ke katiba ya ka ya tshepe, Juda yena ke lere la ka la puso.

¹⁰ Moabe ke lefiso la ho itlhatswetsa, leo ke itlhatswetsang ho lona, Edomo yona ke tla e hapa, Filesitiya teng ke tla etsa ditlatse tsa tlholo.”

¹¹ Ke mang ya tla nkisa motseng, motseng wa diqhobosheane? Ke mang ya tla mphihlisa Edomo,

¹² ha e le moo wena, Modimo, o re lahlile, o se o sa tswe le mabotho a rona?

¹³ Ako re thusetse direng tsa rona, hobane thuso ya motho ke lefeela.

¹⁴ Ka thuso ya Modimo re tla lwana senna, ke yena ya tla hatakela dira tsa rona.