Dipesaleme 6 - BIBELE

Thapelo ya motho ya tsietsing

¹ Pesalema ya Davida. Taelo ho motsamaisi wa dibini: E binwe ka diletsa tsa dikgwele, le ka seletsa se kgwele tse robedi.

² Oho, Morena, o se ke wa nkotla o nkgalefetse, o se ke wa nkgalemela o le bohale.

³ Nkgauhele Morena, hobane ke feletswe ke matla; mphodise Morena, hobane ke opelwa ke masapo,

⁴ mme ke sarelwa haholo. Empa wena Morena, o tla dieha ho fihlela neng?

⁵ Kgutla Morena, o nnamolele, o mpholose ka baka la mohau wa hao.

⁶ Bafu ba ke ke ba o hopola; ke mang ya ka o tlotlisang Nqalong ya Bafu?

⁷ Ke kgathetse ke ho nna ke fehelwa; ka masiu wohle ke kolobisa diphate, ke kolobise diphate tsa ka ka meokgo, ke tshela mosamo wa ka ka dikgapha.

⁸ Mahlo a ka a motela ke maswabi, a fifala ka baka la batubi ba ka.

⁹ Tlohang ho nna, lona bohle ba kgopo, hobane Morena o utlwile sello sa ka.

¹⁰ Morena o utlwile kopo ya ka, Morena o amohetse thapelo ya ka.

¹¹ Dira tsa ka tsohle di tla hlajwa ke dihlong, di tshohe haholo; di tla tjhetjha, di hlajwe ke dihlong hanghang.