Dipesaleme 59 - BIBELE

Modimo ke qhobosheane ya ka

¹ Pesalema ya Davida. Taelo ho motsamaisi wa dibini: E binwe ka mmino wa sefela sa “O se ke wa senya”. Ke ya mohla Saule a neng a rometse batho ho lebela ntlo ya Davida le ho mmolaya.

² Modimo wa ka, ako nnamolele direng tsa ka, o ntshireletse ho ba ntsohetseng matla.

³ Ako nnamolele ho ba etsang tse kgopo, o mpholose ho ba ratang ho tsholla madi.

⁴ Ke bao ba matla ba bokane, ba ntaletse, le hoja ke se na molato kapa sebe, Morena.

⁵ Ba a potlaka, ba itokisetsa nna, le hoja ke sa etsa phoso; tsoha, o nkgahlanyetse, mme o bone.

⁶ Wena Morena, Modimo wa mabotho, Modimo wa Iseraele, tsoha, o otle baditjhaba bohle, o se ke wa hauhela le ya mong, le ya mong wa mahlabaphiyo ao.

⁷ Kamehla ba kgutla ka phirimana, ba rore sa dintja, ba solle hara motse.

⁸ Ke bao ba bebera haholo, ka melomong ya bona ho tswa disabole, mme ba re: “Ke mang ya re utlwang?”

⁹ Empa wena Morena, o a ba tsheha, o soma baditjhaba bohle.

¹⁰ Wena o leng matla a ka, ke shebile wena, hobane Modimo ke qhobosheane ya ka.

¹¹ Modimo ya nkgauhelang o tla nthusetsa, Modimo o tla etsa hore ke telle ba ntaletseng.

¹² O se ke wa ba bolaya, esere tjhaba sa heso sa lebala; o ba qhale ka matla a hao, o ba dihe, wena Morena, thebe ya rona.

¹³ Sebe sa bona ke mantswe a bona, mantswe a tswang melomong ya bona; ba tshwaswe ke boikgohomoso ba bona, ka baka la dithohako le wona mashano ao ba a buang.

¹⁴ Ba fedise ka kgalefo ya hao; ba fedise, ba se hlole ba eba teng, ba tle ba tsebe hore Modimo o a busa, o busa ntlo ya Jakobo, ho isa dipheletsong tsa lefatshe.

¹⁵ Kamehla ba kgutla ka phirimana, ba rore sa dintja, ba solle hara motse,

¹⁶ ba shote, ba batle dijo, ba komakome ha ba sa kgore.

¹⁷ Ha e le nna ke tla bina, ke rorise matla a hao, e sa le hosasa ke tla bolela, ke bolele tsa mohau wa hao ke di bolele ka mehoo ya thabo, hobane o bile qhobosheane ya ka, o bile setshabelo sa ka mohla tsatsi la matshwenyeho a ka.

¹⁸ Wena o leng matla a ka, ke tla o roka, hobane Modimo ke qhobosheane ya ka, ke Modimo ya nkgauhelang.