Dipesaleme 58 - BIBELE

Babusi ba kgopo ba otlwe ke Modimo

¹ Pesalema ya Davida. Taelo ho motsamaisi wa dibini: E binwe ka mmino wa sefela sa “O se ke wa senya”.

² Lona babusi, na ruri le ahlola ka ho loka? Na le ahlola batho ka toka?

³ Tjhe, ka dipelong tsa lona le rera tse kgopo, lefatsheng le etsa tse sehloho, le di etsa ka matsoho a lona.

⁴ Ba kgopo ba senyehile ho tloha popelong, ba leshano ba kgelohile ho tloha tswalong ya bona.

⁵ Mahloko a bona a tshwana le mahloko a noha; ba ithibile ditsebe sa marabe ya manganga,

⁶ ya sa utlweng lentswe la ya mo weweletsang, la ya mo bobisang ka bohlale ba hae.

⁷ Oho, Modimo, pshatla meno a bona, a pshatlelle ka mahanong a bona; oho, Morena, motsula meno, meno a mekwetsepe a ditawana.

⁸ Ba ke ba nyamele sa metsi a phallang, ba ke ba omelle sa jwang bo hataketsweng.

⁹ Ba ke ba qhididihe sa kgofu ha e ntse e tsamaya, ba be jwaloka sefolotsana, sona se sa boneng letsatsi.

¹⁰ Etlare ba eso lemohe a ba fothole sa hlabahlabane, a ba fefole sa lehola ka kgalefo, ka kgalefo ya hae e tukang.

¹¹ Ya lokileng o tla thaba ha a bona phetetso, o tla hlatswa maoto a hae ka madi a ba kgopo.

¹² Batho ba tla re: “Ruri, ya lokileng o newa moputso; ruri, Modimo o teng, o ahlola batho lefatsheng.”