Dipesaleme 56 - BIBELE

Thapelo ya ho tshepa Modimo

¹ Pesalema ya Davida. Taelo ho motsamaisi wa dibini: E binwe ka mmino wa sefela sa modumo wa “Leeba le difateng tse hole”. Ke ya mohla Bafilesita ba neng ba tshwere Davida motseng wa Gate.

² Oho, Modimo, ako nkgauhele, hobane batho ba a nkgatakela, ba ntwantshang ba mpatisitse kamehla,

³ Ba ntaletseng ba nkgatakela kamehla, ba bangata ba ntwantshang.

⁴ Wena Ya Hodimodimo, mohla ke tshohileng, ke tla tshepa wena.

⁵ Ke rorisa Modimo, hobane ke a mo tshepa, ke tshepa Modimo, nke ke ka tshaba letho; motho yena a ka nketsang?

⁶ Ba sotha dipuo tsa ka kamehla, merero yohle ya bona e ntswalla bobe.

⁷ Ba a bokana, ba ipatele nna, ba lalle metsamao ya ka, ba ntse ba tsoma bophelo ba ka.

⁸ Na ba ka phonyoha ka baka la bokgopo ba bona? Oho, Modimo, ako dihe baditjhaba, o ba dihe ka kgalefo ya hao.

⁹ O tseba ho lelera ha ka, o kgakeleditse meokgo ya ka, o e kgakeleditse ka lefiswana; na tsee ha di a ngolwa bukeng ya hao?

¹⁰ Ha ke ipiletsa ho wena, dira tsa ka di tla tjhetjha. Ke a tseba hore Modimo o na le nna.

¹¹ Ke rorisa Modimo hobane ke a mo tshepa, ke rorisa Morena hobane ke a mo tshepa.

¹² Ke tshepile Modimo, nke ke ka tshaba letho; motho yena a ka nketsang?

¹³ Modimo, dikano tsa ka ho wena di ntlamile; ke tla o nyehella ka mahlabelo a teboho,

¹⁴ hobane o mpholositse lefung, o phemisitse maoto a ka, wa a phemisa ho kgopjwa, ke tle ke tsamaye pontsheng ya Modimo, seding la ba phelang.