Dipesaleme 55 - BIBELE

Thapelo ya ho ikopela thuso

¹ Pesalema ya Davida. Thothokiso e nang le thuto. Taelo ho motsamaisi wa dibini: E binwe ka diletsa tsa dikgwele.

² Oho, Modimo, ako sekehe tsebe, o sekehele thapelo ya ka tsebe, o se ke wa furalla thapedi ya ka.

³ Ako mmamele, o be o nkarabe: Ke tsielehile, ke sisa pelo, ke a fehelwa,

⁴ ka baka la ho hlodiuwa ke dira tsa ka, le ka baka la ho hlapaolwa ke ba kgopo. Ba nneta ka bokgopo, ba ntlhorisa ba halefile.

⁵ Pelo ya ka e uba habohloko, matswalo a lefu a mpupeditse.

⁶ Ke kenwe ke letswalo, ke a thothomela, ke aparetswe ke tshabo.

⁷ Ke bile ka re: “Ke mang ya tla mpha mapheo, mapheo a kang a leeba, ke tle ke fofe, ke yo phomola?”

⁸ E, nka be ke baleha, ke eya hole, ke ilo iphelela lehwatateng.

⁹ Ke ne ke tla potlakela ho ya fumana tshireletso meyeng ya ditsokotsane le ya difefo.

¹⁰ Morena, lobokanya merero ya ba kgopo, o ferekanye maleme a bona, hobane nna ke bona sehloho, ke bona le diqabang motseng;

¹¹ di solla hodima marako a motse, di solla teng motsheare le bosiu, bokgopo le bobe di kahara wona.

¹² Hara wona ke timelo feela, bomenemene le mano di ke ke tsa sutha mabaleng a wona.

¹³ Hoja ke sera se ntlhapaolang, ke ne ke tla mamella; hoja ya ntlhoileng ke yena ya ikgantshetsang nna, ke ne ke tla ipatela yena.

¹⁴ Empa ke wena ya nkentseng jwalo, wena o leng molekane wa Ka, le thaka ka, le motswalle wa ka;

¹⁵ wena eo re neng re buisana hamonate, re le sehlopheng se yang tlung ya Modimo.

¹⁶ Lefu le ke le ba kgaoletse, ba ke ba theohele Nqalong ya Bafu, ba theohele ba ntse ba phela, hobane ba ahisane le bokgopo, mme bo hara bona.

¹⁷ Empa nna ke tla ipiletsa ho Modimo, mme Morena o tla mpholosa.

¹⁸ Hoseng, motsheare le mantsiboya, ke sisa pelo, ke a fehelwa, mme o utlwa lentswe la ka.

¹⁹ O mpholositse ntweng, a mpha kgotso, leha ba mphutuhetseng ba ne ba le bangata.

²⁰ Modimo o tla utlwa, a ba kokobetse, yena eo esaleng a ituletse teroneng ya hae; hobane ha ba sokolohe, ha ba tshabe Modimo.

²¹ Molekane wa ka o futuhetse metswalle ya hae, o robile selekane sa hae.

²² Leleme la hae le ne le le monate, empa bora bo ne bo le teng, bo le teng ka pelong ya hae. Mantswe a hae a ne a thoba hamonate, empa e ne e le disabole tse hlabang.

²³ Rolela morwalo wa hao ho Morena, mme o tla o jarisa; a ke ke a tlohella ya lokileng hore a sisinngwe le ka mohla.

²⁴ Wena Modimo, o tla ba dihela, o tla ba dihela mohohlong wa timelo, batho bao ba ratang ho tsholla madi, ba ratang le ho thetsa; ba ke ke ba phela leha e le halofo ya ditshiu tsa motho. Empa nna ke tshepile wena.