Dipesaleme 54 - BIBELE

Thapelo ya ho ikopela tshireletso

¹ Thothokiso e nang le thuto. Taelo ho motsamaisi wa dibini: E binwe ka diletsa tsa dikgwele. Pesalema ya Davida.

² ya mohla baahi ba Sife ba tlileng ho Saule, ba re: “Ha re re Davida o ipatile habo rona!”

³ Oho, Modimo, ako mpholose, mpholose ka baka la lebitso la hao, o nkahlolele ka matla a hao.

⁴ Oho, Modimo, ako mamele thapelo ya ka, o sekehele dipolelo tsa ka tsebe.

⁵ Baikakasi ba ntsohetse matla, ba sehloho ba batla bophelo ba ka, ha ba na taba le Modimo.

⁶ Empa nna Modimo o a nthusa, Morena ke mmaballi e moholo, ke mmaballi wa bophelo ba ka.

⁷ Ba ntaletseng ba ke ba putswe ka bobe; ba fedise ka baka la botshepehi ba hao.

⁸ Ke tla ithaopela ho o nyehella ka sehlabelo, ke boke bitso la hao, Morena, hobane le molemo.

⁹ O ntopolotse matshwenyehong a ka kaofela; ke tadima dira tsa ka ka tello.