Dipesaleme 52 - BIBELE

Modimo o ahlola ya sehloho

¹ Pesalema ya Davida. Thothokiso e nang le thuto;

² ya mohla Doege, Moedomo, a neng a tlilo tsebisa Saule hore Davida o kene tlung ya Abimeleke.

³ O ithorisetsang ka bobe, wena ya sehloho? Tseba, mohau wa Modimo ke wa kamehla yohle.

⁴ O ntse o rera ho timetsa ba bang, leleme la hao le ka lehare le bohale, wena ya etsang bolotsana.

⁵ O rata bobe ho ena le botle, le leshano ho ena le nnete.

⁶ O rata dipuo tse timetsang, wena ya leleme le thetsang!

⁷ Modimo o tla o ripitlela ruri, a o hlwibile, a o hotolele ntle ho tente ya hao, a o fedise lefatsheng la ba phelang.

⁸ Ba lokileng ba tla bona tsena, mme ba tshabe; ba tla mo tsheha, ba re:

⁹ “Bonang motho ya sa etsang Modimo tshabelo sa hae, ya itshepetseng bongata ba maruo a hae, ya entseng bokgopo setshabelo sa hae.”

¹⁰ Empa nna, ka tlung ya Modimo, ke jwaloka sefate sa mohlwaare, fate se setalana; ke tshepa mohau wa Modimo, ke o tshepa kamehla le mehla.

¹¹ Ke tla o boka kamehla ka seo o se entseng, ke tlotlise bitso la hao ke le hara batshepuwa ba hao, hobane wena o molemo.