Dipesaleme 50 - BIBELE

Borapedi ba nnete

¹ Pesalema ya Asafo. Modimo ya matla wohle, Morena, o buile, o bitsa lefatshe lohle ho tloha botjhabela ho isa bophirimela.

² Modimo o kganya a le Sione, motseng o motlemotle.

³ Modimo wa rona o a tla, a ke ke a hlola a kgutsa. Kepele ho yena ke mollo, mollo o tjhesang lore! Sefefo se matla se mo teetse hare.

⁴ O bitsa mahodimo le lefatshe ho tla kahlolong ya setjhaba sa hae.

⁵ O re: “Bokellang batshepuwa ba ka, le ba bokelle kapele ho nna, e leng ba entseng selekane le nna ba se entseng ka mahlabelo.”

⁶ Mahodimo a bolela ho loka ha hae, kaha Modimo ke yena moahlodi.

⁷ “Mamelang, lona setjhaba sa ka, mme ke tla bua; wena Iseraele, ke tla o qosa. Ke nna Modimo, Modimo wa hao.

⁸ Ha ke o nyatsetse mahlabelo a hao, hobane ha o kgaotse ho nnyehella ka ditjheso.

⁹ Nke ke ka amohela poho ya saka la hao, leha e le phooko ya mohlape wa hao;

¹⁰ hobane dibatana tsohle tsa meru ke tsa ka, le tsona diphoofolo tse diketekete dithabeng.

¹¹ Ke tseba dinonyana tsohle tse sepakapakeng, le dinyamatsane tsohle tsa naha ke tsa ka.

¹² Hoja ke ne ke lapile, ke ne ke sa tlo o bolella, hobane lefatshe ke la ka, le tsohle tse ho lona.

¹³ Na ke ja nama ya dipoho? Kapa ke nwa madi a diphooko?

¹⁴ Nyehella Modimo ka sehlabelo sa teboho, phetha dikano tsa hao ho Ya Hodimodimo.

¹⁵ Ipiletse ho nna ka nako ya matshwenyeho; ke tla o lopolla, mme wena o tla ntlotlisa.”

¹⁶ Empa ho ya kgopo Modimo o re: “O na le tokelo efe ya ho bolela melao ya ka, kapa ho boledisa selekane sa ka, o se boledisa ka molomo wa hao,

¹⁷ athe o hloile ho kgalemelwa, o lahlile mantswe a ka ho hang?

¹⁸ Ha o bona leshodu, o so kgema le lona; o motswalle wa difebe.

¹⁹ O dumella molomo wa hao ho bua tse mpe, leleme la hao le loha mano.

²⁰ O duletse ho bua ngwaneno hampe; o silafatsa ngwana mmao.

²¹ Tsena o di entse; jwale o re nka kgutsa? O hopola hore ke tshwana le wena? Ke tla o kgalemela, ke totobatse tsohle mahlong a hao.

²² “Lona ba lebalang Modimo, le ke le lemohe tsena, esere ka le harola, mme la hloka ya le namolelang.

²³ Ya nnyehellang ka sehlabelo sa teboho ka sona o a ntlotlisa, ya tsamayang ka ho loka ke tla mmontsha kamoo Modimo a pholosang kateng.”