Dipesaleme 5 - BIBELE

Thapelo ya hoseng

¹ Pesalema ya Davida. Taelo ho motsamaisi wa dibini: E binwe ka makodilo.

² Oho, Morena, ako sekehele mantswe a ka tsebe, o mamele mefehelo ya ka.

³ Wena kgosi ya ka le Modimo wa ka, ako utlwe ha ke llela thuso. Ke rapela wena Morena,

⁴ hoseng o utlwa sello sa ka; hoseng ke lokisa sehlabelo, mme ke lebella karabelo ya hao.

⁵ O Modimo ya sa thabeleng bokgopo; motho e mobe o ke ke wa mo amohela.

⁶ Baikgohomosi ba ke ke ba ema pela sefahleho sa hao; o hloile bohle ba etsang tse sa lokang.

⁷ O timetsa ba leshano; Morena o nyonya babolai le bathetsi.

⁸ Empa nna nka kena tlung ya hao, ka baka la boholo ba mohau wa hao. Ke tla o kgumamela ka tshabo, ka Tempeleng ya hao e halalelang.

⁹ Morena, ako ntataise ka ho loka ha hao, ka baka la dira tsa ka tse ntaletseng. Batalatsa tsela ya hao kapele ho nna.

¹⁰ Melomong ya dira tsa ka ha ho nnete e tswang, dipelong tsa tsona di rera ho timetsa, mmetso ya tsona ke lebitla le ahlameng, maleme a tsona a monate.

¹¹ Modimo, di ahlolele molato wa tsona, di we ka baka la merero ya tsona. Di leleke ka baka la ditlolo tsa tsona tse ngata, hobane di o teletse.

¹² Empa bohle ba tshabelang ho wena ba ke ba thabe, bao o ba sireletsang ba se kgaotse ho etsa ditlatse, bohle ba ratang lebitso la hao ba o nyakallele.

¹³ Ke wena Morena, ya hlohonolofatsang ya lokileng, o mo sireletsa ka mohau wa hao jwalokaha eka ke thebe.