Dipesaleme 49 - BIBELE

Bothoto ba ho tshepa maruo

¹ Pesalema ya bara ba Kora, e qapetsweng motsamaisi wa dibini.

² Mamelang, lona ditjhaba tsohle; sekehang tsebe, lona baahi bohle ba lefatshe,

³ lona bafo le lona marena, lona barui le mafutsana hammoho.

⁴ Molomo wa ka o tla bua tsa bohlale, pelong ya ka ke tla nahana tse nang le kelello.

⁵ Ke tla sekehela maele tsebe, ke tla hlalosa selotho sa ka ke ntse ke letsa harepa.

⁶ Nka tshoha eng nakong tse mpe, ha ke teetswe hare ke dira tse kgopo,

⁷ e leng batho ba tshepileng matlotlo a bona, ba ithorisang ka maruo a bona a mangata?

⁸ Ha ho motho ya ka lopollang ngwanabo, leha e le ho mo lefella ho Modimo.

⁹ Tefello ya bophelo ba motho e feta matla a hae, a ke ke a e lekana le ka mohla!

¹⁰ Motho a ke ke a phela hoyahoile, a se ke a tseba lebitla.

¹¹ O tla fela a bone hore le ba bohlale ba a shwa, sethoto le lewatla ba timela ka ho tshwana, ba siele ba bang matlotlo a bona.

¹² Mabitla a bona ke matlo a bona a mehla yohle, ke leaho la bona ho isa melokong yohle, le hoja dinaha di reeletswe ka bona.

¹³ Motho ya phelelang leruo o hloka kelello, o tshwana le diphoofolo tse shwang.

¹⁴ Ena ke yona tsela ya ba itshepileng, ke pheletso ya ba kgotsofetseng, ba kgotsofaletseng matlotlo a bona.

¹⁵ Ba kgannelwa Nqalong ya Bafu jwaloka dinku; lefu e tla ba modisa wa bona. Ba tla theohela lebitleng, sebopeho sa bona se tla senyeha; Nqalo ya Bafu e tla ba leaho la bona.

¹⁶ Empa Modimo o tla ntopolla, a nntshe diatleng tsa lefu.

¹⁷ O se ke wa tshoha leha motho a ka rua, mme matlotlo a ntlo ya hae a eketseha;

¹⁸ hobane mohla a shwang a ke ke a nka letho, matlotlo a hae a ke ke a mo sala morao.

¹⁹ Le hoja ha a sa phela, a ne a ikuka a le lehlohonolo, kapa a ne a rorisetswa katleho ya hae,

²⁰ o tla be a yo fihla molokong wa bo-ntatae, ba ke keng ba hlola ba bona lesedi.

²¹ Motho ya phelelang leruo o hloka kelello, o tshwana le diphoofolo tse shwang.