Dipesaleme 46 - BIBELE

Modimo o na le rona

¹ Sefela sa bara ba Kora. Taelo ho motsamaisi wa dibini: Se binwe ka lentswe le lesesanyane.

² Modimo ke setshabelo sa rona le matla a rona; ke thuso e teng kamehla, thuso matshwenyehong.

³ Ka baka leo, re ke ke ra tshaba, leha lefatshe le ka reketla, le dithaba tsa sisinyeha botebong ba lewatle;

⁴ leha metsi a lona a ka befa, a tlokoma mafilo, dithaba tsa reketliswa ke ho tuduana ha wona.

⁵ Noka e teng eo makala a yona a thabisang motse wa Modimo, leaho le halalelang la Ya Hodimodimo.

⁶ Modimo o bohareng ba motse oo, o ke ke wa sisinyeha; Modimo o tla o thusa ha mafube a hlaha.

⁷ Ditjhaba di a befa, mebuso e a sisinyeha; ha a kgaruma, lefatshe le a qhibidiha.

⁸ Morena wa mabotho o na le rona, Modimo wa Jakobo ke qhobosheane ya rona.

⁹ Tloong, le bohe mesebetsi ya Morena, kamoo a ripitlileng lefatshe kateng.

¹⁰ O fedisa dintwa ho isa pheletsong tsa lefatshe; o robakanya diqha, a pome marumo, a tjhese dithebe mollong, a re:

¹¹ “Kgaotsang, le tsebe hore nna ke Modimo, ke tla okamela ditjhaba, ke okamele lefatshe.”

¹² Morena wa mabotho o na le rona, Modimo wa Jakobo ke qhobosheane ya rona.