Dipesaleme 45 - BIBELE

Pina ya lenyalo la kgosi

¹ Thothokiso e nang le thuto, ya bara ba Kora. Pina ya lerato. Taelo ho motsamaisi wa dibini: E binwe ka mmino wa sefela sa “Mohaladitwe”.

² Pelong ya ka ho tletse taba tse monate, ke bolela tseo ke di qapetseng kgosi, leme la ka le ka lesiba la sengodi, siba la sengodi se mahlahahlaha.

³ O motle ho feta bana bohle ba batho, molomo wa hao o a kgahleha, hobane Modimo o o hlohonolofatsa kamehla.

⁴ Wena mohale, tlamella sabole ya hao qholong; ka hlompho le ka botlotlehi ba hao,

⁵ palama, o hlole, o lwanele nnete, le boikokobetso, le ho loka. Tsoho la hao le letona le o etsetse diketso tse makatsang.

⁶ Metsu ya hao e leotsehile, ditjhaba di tla wela tlasa puso ya hao, dira tsa kgosi di tla nyahama pelo.

⁷ Terone ya hao, Modimo, ke ya kamehla le mehla, lere la hao la puso ke lere la toko.

⁸ O rata ho loka, o hloile bokgopo. Kahoo Modimo, Modimo wa hao, o o tlotsitse ka ole ya thabo, ho ena le balekane ba hao;

⁹ aparo tsa hao tsohle di nonoditswe ka mmira, le ka lekgala, le ka sente. Matlung a kgabisitsweng ka manaka a tlou ho utlwahala harepa tse o thabisang.

¹⁰ Kgosatsana di teng hara mafumahatsana, mafumahatsana a hao a lomphehang; mofumahadi o eme tsohong la hao le letona, o eme a kgabile ka kgauta ya Ofire.

¹¹ Mamela, morwetsana; bona, o sekehe tsebe; tela tjhaba sa heno le lapa leno,

¹² hore kgosi e tle e tjhatjhehele botle, e tjhatjhehele botle ba hao haholo. Kahobane ke yona monga hao, o itihe maotong a yona.

¹³ Ba motse wa Tire ba tla o nyehella ka dimpho, barui ba baditjhaba ba tla batla thuso ya hao.

¹⁴ Kgosatsana e kena e le Seilatsatsi, aparo tsa yona di homilwe ka kgauta;

¹⁵ e iswa ho kgosi e apere tse mahadihadi. Baetsana ba barwetsana ba tliswa ho kgosi.

¹⁶ Ba tliswa ka thabo le nyakallo, ba kena ka tlung ya kgosi.

¹⁷ Tulong tsa bo-ntatao ho tla dula bara ba hao, o tla ba bea mahosana naheng yohle.

¹⁸ Ke tla etsa hore bitso la hao le hopolwe ke meloko yohle; ka baka leo, tjhaba di tla o boka, di o boke kamehla le mehla.