Dipesaleme 4 - BIBELE

Thapelo ya mantsiboya

¹ Pesalema ya Davida. Taelo ho motsamaisi wa dibini: E binwe ka diletsa tsa dikgwele.

² Oho, Modimo, mosireletsi wa ditokelo tsa ka, ako nkarabe ha ke ipiletsa ho wena. O ntokolotse matshwenyehong a ka; nkgauhele, o mamele thapelo ya ka.

³ Lona batho ting! le tla ntlontlolla ho fihlela neng, le rate mafeela, le mathele mashano?

⁴ Tsebang hore Morena o etsetsa motshepuwa wa hae tse hlollang, Morena o a mmamela ha ke ipiletsa ho yena.

⁵ Tshabang Modimo, le se hlole le etsa sebe; tholang, mme le thuise tsena ka dipelong, le di thuise ha le le diphateng.

⁶ Nyehelang ka mahlabelo ka mokgwa o lokelang, le nyehele ka wona, le tshepe Morena.

⁷ Ba bangata ba re: “Re tla fumantshwa lehlohonolo ke mang?” Oho, Morena, re phuthollele sefahleho sa hao.

⁸ O thabisitse pelo ya ka ho feta mohla batho ba atetsweng ke koro le veine.

⁹ Ke tla ithoballa ka kgotso, ke kgalehe hanghang, hobane Morena ke wena feela, ke wena feela ya ntshireletsang kahohle.