Dipesaleme 39 - BIBELE

Bophelo ba motho bo feta kapele

¹ Pesalema ya Davida, e qapetsweng motsamaisi wa dibini; ya Jedutune.

² Ke ile ka re: “Ke tla hlokomela metsamao ya ka, ke tle ke se ke ka etsa sebe ka leleme la ka; ke tla tshwara leleme la ka ha ya kgopo a ntse a le pela ka.”

³ Ke ne ke kgutsitse jwaloka semumu, ke thotse; ka baka la katleho ya hae, bohloko ba ka ba nna ba tota,

⁴ pelo ya ka ya tlallana, ha ke ntse ke fehelwa ka tuka malakabe, ka ba ka bua, ka re:

⁵ “Morena, ako ntsebise pheletso ya ka, le bolelele ba matsatsi a ka; a nke ke tsebe hore na bophelo ba ka bo feta kapele hakaakang!

⁶ Bona, matsatsi a ka o a lekantse, o a lekantse ka bophara ba seatla, bolelele ba bophelo ba ka hase letho mahlong a hao. Ruri motho ya phelang ke lefeela.

⁷ “Motho ya tsamayang o ka seriti feela, maruo ao a ipokellelang wona ke lefeela; ha a tsebe hore na a tla sebediswa ke mang.”

⁸ Jwale, Morena, ekaba ke sa lebeletseng? Tshepo ya ka e ho wena.

⁹ Ntopolle ditlolong tsa ka tsohle, se nketse sesomo ho dithoto.

¹⁰ Ke jwaloka semumu, ha ke na puo, hobane ke wena ya sebetsang.

¹¹ Mphemise dikotlo tsa hao, letsoho la hao le nqetile.

¹² O kgalemela motho ka ho mo otla, ka ho mo otlela melato ya hae, o fedisa seo a se ratang jwalokaha eka se jewa ke tshwele. Ruri motho ke lefeela.

¹³ Morena, ako utlwe thapelo ya ka, o sekehele thapedi ya ka tsebe, o se hane ho mamela sello sa ka. Ke mojaki naheng ya hao, ke mofeti jwaloka bo-ntate.

¹⁴ Se ntjamele, ke tle ke thabe, ke eso ikele, mme ka ba siyo.