Dipesaleme 38 - BIBELE

Moetsadibe o ipiletsa ho Modimo

¹ Pesalema ya Davida, ya kgopotso.

² Oho, Morena, o se ke wa nkotla o nkgalefetse, o se ke wa nkgalemela o le bohale.

³ Metsu ya hao e ntlhabile, letsoho la hao le nkotlile habohloko.

⁴ Ha ho moo ho seng bohloko mmeleng wa ka, ka baka la kgalefo ya hao; ha ho bophelo masapong a ka, ka baka la sebe sa ka.

⁵ Melato ya ka e mpupeditse hlooho, e nkimela jwaloka mojaro o boima.

⁶ Maqeba a ka a a nkga, a phephetha boladu, ka baka la bothoto ba ka.

⁷ Ke kotlobane, ke a kgokgoba, ke tsamaya tsatsi lohle ke hlomohile.

⁸ Letheka la ka le a futha, ha ho moo ho seng bohloko mmeleng wa ka.

⁹ Ke a fokola, ke robehile ditho, ke dumaela ka baka la ho hlora ha pelo ya ka.

¹⁰ Morena, o tseba tsohle tseo ke di lakatsang, ho fehelwa ha ka ha ho a pateha ho wena.

¹¹ Pelo ya ka e otla habohloko, ke feletswe ke matla; mahlo a ka a fifetse.

¹² Metswalle le balekane ba ka ba emeletse thoko le bohloko ba ka, baheso ba emeletse hole le nna.

¹³ Ba batlang bophelo ba ka, ba ntjhehile ka maraba, ba ntakaletsang bomadimabe, ba ntherela timelo, tsatsi lohle ba ntohela mano.

¹⁴ Empa nna ke jwaloka tsebetutu, ha ke utlwe; ke jwaloka semumu, ha ke bue.

¹⁵ Nna ke jwaloka motho ya sa utlweng ditsebeng, eo molomong wa hae ho seng dikgang.

¹⁶ Morena, ke tshepile wena; ke wena ya tla nkaraba, Morena Modimo wa ka,

¹⁷ ha ke re: “Ba se ke ba ithabisa ka nna, ba ithorisa ha leoto la ka le thella.”

¹⁸ Ke lekgatheng la ho wa, ke utlwa bohloko kamehla.

¹⁹ Ke bolela molato wa ka, ke swabela sebe sa ka.

²⁰ Ba itshemmeng bora ho nna ba matla, ba ntlhoileng ntle ho lebaka ba ngatafetse,

²¹ e leng ba mpuseletsang botle ka bobe, ba nqosang hobane ke latela botle.

²² Morena, o se ke wa ntahla; Modimo wa ka, se be hole le nna.

²³ Phakisa o nthuse, Morena, wena mopholosi wa ka.