Dipesaleme 31 - BIBELE

Ke bea moya wa ka matsohong a hao

¹ Pesalema ya Davida, e qapetsweng motsamaisi wa dibini.

² Ke tshabela ho wena Morena; ke se ke ka hlajwa ke dihlong le ka mohla. Ako nnamolele ka baka la ho loka ha hao.

³ Ntshekehele tsebe, o potlakele ho ntopolla. O be lefika leo ke tshabelang ho lona, qhobosheane e mpholosang.

⁴ Wena o lefika la ka le qhobosheane ya ka; ntsamaise, o ntataise ka baka la lebitso la hao.

⁵ Mphemise leraba leo ke le tjhehetsweng, hobane ke wena setshabelo sa ka.

⁶ Ke bea moya wa ka matsohong a hao; o ntopolotse Morena, Modimo ya tshepahalang.

⁷ O hloile ba sebeletsang medimo ya bohata, athe nna ke tshepile Morena.

⁸ Ke tla nyakalla, ke thabele mohau wa hao, hobane o bone ho hlopheha ha ka, wa lemoha matshwenyeho a ka;

⁹ ha o a ka wa nneella dira tsa ka, empa o ntsamaisa ka bolokolohi.

¹⁰ Nkgauhele Morena, hobane ke matshwenyehong; mahlo a ka a motela ke maswabi, esita le moya wa ka, le mmele wa ka.

¹¹ Bophelo ba ka bo fedile, bo fedile ke mahlomola, dilemo tsa ka di ile ke ho fehelwa; matla a ka a fediswa ke ho hlopheha, le masapo a ka a kgathetse.

¹² Nna ke sekgobo ho dira tsa ka tsohle, haholoholo ho bao ke ahisaneng le bona, ke koko ho metswalle ya ka, ba mponang ditseleng ba a mpaleha.

¹³ Ha ke sa hopolwa; jwalokaha eka ke mofu, ke tshwana le ntho e lahlilweng.

¹⁴ Ke utlwa ditshebo tsa ba bangata, ke tshoswa ka nqa tsohle; batho ba nkunuta ba le mmoho, ba rera ho fedisa bophelo ba ka.

¹⁵ Empa nna ke tshepile wena Morena, ke re: “O Modimo wa ka!”

¹⁶ Ditshiu tsa ka di matsohong a hao; nnamolele diatleng tsa dira tsa ka, o nnamolele le ho bahlorisi ba ka.

¹⁷ Ako bontshe mohlanka wa hao, o mmontshe sefahleho, sefahleho se kganyang kgotso, o mpholose ka mohau wa hao.

¹⁸ Morena, ha ke ipiletsa ho wena ke se ke ka hlajwa ke dihlong, empa dihlong di ke di hlabe ba kgopo, ba kgutsiswe ka ho theolelwa Nqalong ya Bafu.

¹⁹ Ba buang leshano ba fetohe dimumu, baikakasi bana ba buang hampe ka ya lokileng, ba ikgohomosetsang yena, ba mo nyedise.

²⁰ Morena, molemo wa hao o mokaakang! O o boloketse ba o tshabang; pontsheng ya bana ba batho o o etsetsa ba tshabelang ho wena.

²¹ O ba pata ho wena ka sebele, hole le merero e mebe ya batho; o ba sireletsa motlotlwaneng wa hao, hole le maleme a jalang diqabang.

²² Ho bokwe Morena ya mpontshitseng mohau, ya mpontshitseng mohau o hlollang, ha ke ne ke dikilwe, ke futuhetswe.

²³ Matswalong a ka, ka re: “O ntahletse hole le sefahleho sa hao.” Empa wa utlwa thapedi ya ka, ha ke ne ke o llela.

²⁴ Ratang Morena, lona batshepuwa bohle ba hae; Morena o baballa ba tshepahalang; baikgohomosi bona o ba nea se ba lokelang.

²⁵ Ebang sebete, le tiye dipelo, lona bohle ba tshepileng Morena.