Dipesaleme 30 - BIBELE

Teboho ya ho pholoswa lefung

¹ Pesalema ya Davida. Sefela sa ho kgakola tempele.

² Ke a o tumisa, Morena, hobane o mpholositse; ha o a ka wa tlohela dira tsa ka ho ithabisa ka nna.

³ Morena Modimo wa ka, ka ipiletsa, ka ipiletsa ho wena, mme wa mphodisa.

⁴ Morena, o nnyolotse Nqalong ya Bafu, wa nkgutlisa ho ba neng ba theohela lebitleng.

⁵ Rokang Morena, lona batshepuwa bohle ba hae, le boke lebitso la hae le halalelang.

⁶ Kgalefo ya hae ke ya motsotswana feela, lerato la hae ke la bophelo bohle ba motho. Leha nka robala ka meokgo, ha bo esa e se e le nyakallo.

⁷ Ha ke ne ke sa iketlile, ka na ka re: “Nke ke ka sisinngwa le ka mohla!”

⁸ Morena, ka mohau wa hao o ntshireleditse qhobosheaneng; yare ha o mpatela fahleho sa hao, ka tshoha haholo.

⁹ Ka ipiletsa ho wena Morena, ka etsa thapedi ho Morena, ka re:

¹⁰ “O ka ruang ka madi a ka, le ka ho theohela ha ka lebitleng? Na bafu ba ka o boka, kapa ba bolela botshepehi ba hao?

¹¹ Ako nkutlwe, Morena, mme o nkgauhele; Morena, ako be mothusi wa ka!”

¹² Bofifi ba ka o bo fetotse mohobelo; o ntlhobodisitse thapo, wa nkapesa seaparo sa thabo,

¹³ e le hore moya wa ka o tle o o roke o sa kgaotse; Morena Modimo wa ka, ke tla o boka kamehla le mehla.