Dipesaleme 29 - BIBELE

Lentswe la Morena hara sefefo

¹ Pesalema ya Davida. Thoholetsang Morena, lona bara ba Modimo; thoholetsang tlotla le matla a Morena.

² Thoholetsang tlotla e lokelang lebitso la Morena; kgumamelang Morena le kgabile, le kgabile ka tse halalelang.

³ Lentswe la Morena le utlwahala hodima metsi, Modimo ya tlotlehang o a thwathwaretsa, Morena o hodima metsi a mawatle.

⁴ Lentswe la Morena le matla, lentswe la Morena le a tshabeha.

⁵ Lentswe la Morena le roba difate tsa dikedare, Morena o roba dikedare, kedare tsa Lebanone.

⁶ Lebanone o e thadisa jwaloka namane, le Sirione jwaloka pohwana ya nare.

⁷ Lentswe la Morena le tlola malakabe;

⁸ lentswe la Morena le tetemisa lehwatata, Morena o tetemisa lehwatata la Kadeshe.

⁹ Lentswe la Morena le ekethehisa difate, le fohle meru, mme ka tempeleng ya hae bohle ba re: “O a tlotleha!”

¹⁰ Morena o ne a rena hodima morallo wa metsi, Morena ke kgosi e renang kamehla le mehla.

¹¹ Morena a ke a matlafatse setjhaba sa hae, Morena a ke a se hlohonolofatse ka kgotso.