Dipesaleme 25 - BIBELE

Thapelo ya ho ikopela tshireletso

¹ Pesalema ya Davida. Morena ke o rapela ka moya wa ka wohle,

² ke rapela wena Modimo wa ka. Ke o tshepile, ke se ke ka hlajwa ke dihlong; dira tsa ka di se ke tsa ntsheha.

³ Bohle ba o tshepang ha ba hlajwe ke dihlong, dihlong di hlaba ba sa tshepahaleng.

⁴ Morena, mpontshe ditsela tsa hao, o nthute mehlala ya hao.

⁵ Ntsamaise nneteng ya hao, o nthute yona, hobane wena o Modimo ya mpholosang; ke o lebeletse ka matsatsi wohle, ka baka la molemo wa hao Morena.

⁶ Morena, hopola lerato le mohau wa hao, hobane esale o le teng ho tloha kgale.

⁷ Nteballe dibe le ditlolo tsa botjha ba ka, nkgopole ka mohau wa hao.

⁸ Morena o molemo, o lokile; kahoo o busetsa baetsadibe tseleng.

⁹ Ba eisehang o ba tsamaisa ho lokeng, o ruta ba eisehang tsela ya hae.

¹⁰ Ditsela tsohle tsa Morena ke tsa mohau le botshepehi, ho ba bolokang selekane sa hae, le ho ba bolokang ditemoso tsa hae.

¹¹ Ka baka la lebitso la hao Morena, ntshwarele molato wa ka, hobane o moholo.

¹² Haeba ho teng ya tshabang Morena, Morena o tla mmontsha tsela, tsela eo a tshwanetseng ho e kgetha.

¹³ Eo o tla phela ka boiketlo, lefatshe e tla ba lefa la ditloholo tsa hae.

¹⁴ Morena ke motswalle wa ba mo tshabang, o ba tsebisa selekane sa hae.

¹⁵ Mahlo a ka a tadimile Morena kamehla, hobane ke yena ya tshwasollang maoto a ka lerabeng.

¹⁶ Retelehela ho nna, o nkgauhele, hobane ke nnotshi, mme ke hlophehile.

¹⁷ Fedisa matshwenyeho a pelo ya ka, o nntshe makaqabetsing a ka.

¹⁸ Tadima ho hlopheha ha ka le tsietsi ya ka, mme o ntshwarele dibe tsa ka tsohle.

¹⁹ Bona kamoo dira tsa ka di leng ngata kateng, le kamoo di ntlhoileng hampe kateng.

²⁰ Ako baballe bophelo ba ka, o nnamolele, ke se ke ka hlajwa ke dihlong, kaha ke tshabela ho wena.

²¹ Ako ntshireletse hobane ke hloka kodi, ke lokile; hobane ke o lebeletse, Morena.

²² Modimo, ako lopolle Iseraele, o mo lopolle matshwenyehong a hae wohle.