Dipesaleme 24 - BIBELE

Morena o kena Sione

¹ Pesalema ya Davida. Lefatshe ke la Morena le tsohle tse ho lona, lefatshe le bohle ba ahileng ho lona.

² Ke yena ya le theileng hodima mawatle, a le tiisa hodima madiba.

³ Ke mang ya ka nyolohelang thabeng ya Morena? Ke mang ya ka emang Sehalalelong sa hae?

⁴ Ke ya matsoho a hlokang molato, ya pelo e hlwekileng, ya sa lakatseng mafeela, ya sa hlapanyetseng leshano.

⁵ O tla fumana lehlohonolo ho Morena, le ho loka ho Modimo, mopholosi wa hae.

⁶ O jwalo moloko wa ba batlang Modimo, ba ratang ho bona fahleho sa hao, wena Modimo wa Jakobo.

⁷ Lona menyako, bulehang! Ipuleng, lona menyako ya boholoholo, ho tle ho kene Kgosi e tlotlehang.

⁸ Kgosi eo e tlotlehang ke mang? Ke Morena ya matla, wa mohale, Morena eo e leng mohale ntweng.

⁹ Lona menyako, bulehang! Ipuleng, lona menyako ya boholoholo, ho tle ho kene Kgosi e tlotlehang.

¹⁰ Kgosi eo e tlotlehang ke mang? Ke Morena wa mabotho, ke yena Kgosi e tlotlehang.