Dipesaleme 19 - BIBELE

Modimo, Mmopi, le mofani wa Molao

¹ Pesalema ya Davida, e qapetsweng motsamaisi wa dibini.

² Mahodimo a phatlalatsa tlotla ya Morena, sebaka sa lehodimo se a bolela, se bolela mosebetsi wa diatla tsa hae;

³ letsatsi ka leng le phetela le leng, bosiu ka bong bo tsebisa bo bong,

⁴ ho se puo, ho se polelo, ho se mantswe a utlwahalang.

⁵ Empa modumo wa tsona o anetse lefatshe lohle, polelo tsa tsona di finyeletse, di finyeletse pheletsong tsa lefatshe. Mahodimong, Modimo o hlometse letsatsi tente,

⁶ mme lona le ka monyadi a etswa leqatheng, jwaloka mohale, le thabela ho qeta tsela ya lona.

⁷ le tjhaba ntlheng e nngwe ya mahodimo, le potoloha ho fella ntlheng e nngwe; ha ho letho le ka balehang mofuthu wa lona.

⁸ Molao wa Morena o phethehile, ke mmusapelo; temoso tsa Morena di a tshepahala, di hlalefisa sethoto.

⁹ Melao ya Morena e lokile, e hlatswa pelo; taelo ya Morena e hlakile, e edisa mahlo.

¹⁰ Ho tshaba Morena ke ntho e molemo, e ke keng ya fetoha ho isa kgale; dikahlolo tsa Morena ke tsa nnete, kaofela ha tsona di lokile.

¹¹ Di kgahleha ho feta kgauta, ho feta le kgauta e hlwekisitsweng haholo; di monate ho feta mahe a dinotshi, mahe a rothang kgekgeng ya tsona.

¹² Di ruta mohlanka wa hao, ya di bolokang o fumana moputso o moholo.

¹³ Empa ke mang ya ka elellwang diphoso tsa hae? Ako ntokolle ho tseo ke sa di tsebeng.

¹⁴ Phemisa mohlanka wa hao, o mo phemise boikgantsho, o se ke wa dumella hore bo mpuse. Kahoo ke tla hloka kodi, ke hloke molato wa sebe se seholo.

¹⁵ Ako kgahlwe ke mantswe a tswang molomong wa ka, le ke menahano e ka pelong ya ka, wena Morena, lefika la ka, le molopolli wa ka.