Dipesaleme 18 - BIBELE

Sefela sa Davida sa teboho

¹ Sa motsamaisi wa dibini. Sefela sa Davida, mohlanka wa Morena, seo a neng a se binele Morena, mohla Morena a mo namoletseng matsohong a dira tsa hae, le matsohong a Saule,

² a re: Ke a o rata Morena, wena matla a ka.

³ Morena ke lehaha la ka, ke qhobosheane ya ka, ke monamoledi wa ka. Modimo wa ka ke lefika la ka, leo ke tshabelang ho lona; Morena ke thebe ya ka, ke lenaka la ka le ntwanelang, ke seqhobo sa ka.

⁴ Ke ipileditse ho Morena ya lokelang ho roriswa, mme ka pholoswa direng tsa ka.

⁵ Maqhubu a lefu a ne a ntikile, phororo tsa timelo di ne di nkukile.

⁶ Maraba a lefu a ne a mpotapotile, difi tsa lefu di ne di ntjhehile.

⁷ Makaqabetsing a ka ka ipiletsa ho Morena, ka llela Modimo wa ka hore a nthuse; a utlwa lentswe la ka a le ka tempeleng ya hae, sello sa ka sa fihla tsebeng tsa hae.

⁸ Lefatshe la reketla, la thothomela, metheo ya dithaba ya tsukutleha, ya reketla, hobane a halefile.

⁹ Mosi wa foqoha ka nkong tsa hae, mollo o timetsang wa betseha ka hanong la hae, mashala a hlenneng a tswa ka ho lona.

¹⁰ A phetla mahodimo, a theohela fatshe, leru le letsho le le maotong a hae;

¹¹ a fofa a palame kerubime, a hoballa a le mapheong a moya.

¹² Lefifi a le etsa lesira la hae, maru a matsho a dusang pula, wona a a etsa tente ya hae;

¹³ maru a apolwa ke kganya e mo etellang pele, ha na sefako sa mashala a tukang.

¹⁴ Morena a thwathwaretsa, a thwatharetsa a le mahodimong, Ya Hodimodimo a utlwahatsa lentswe la hae;

¹⁵ a fula ka metsu ya hae, dira tsa qhalana, a betsa mahadima, mme tsa phasaphasa.

¹⁶ Madiba a mawatle a bonahala tlasetlase, metheo ya lefatshe ya phetleha, ha ho omana wena Morena, ha ho foka moya o tswang ka nkong tsa hao.

¹⁷ Morena a nnanabela a le hodimo, a nnanabela a ntshwara, a nkinola metsing a lewatle;

¹⁸ a nnamolela sereng sa ka se matla, ho ba ntlhoileng, ba neng ba mphekisa.

¹⁹ Ba mphutuhela mohla tlokotsi ya ka, empa Morena a nthusetsa;

²⁰ a ntokolla, a mpholosa, a mpholosa hobane a nthata.

²¹ Morena o mputsitse ho ya ka ho loka ha ka, o mpuseleditse ho ya ka ho hloka molato ha ka.

²² Ke tiiseditse tseleng ya Morena, ha ke a etsa bokgopo, ka arohana le Modimo wa ka.

²³ Ke fadimehetse kahlolo tsa hae tsohle, ha ke a qhelela taelo tsa hae kathoko.

²⁴ Mahlong a hae ha ke na kodi, ke ipolokile ke se na molato.

²⁵ Morena o mputsitse ho ya ka ho loka ha ka, hobane o a bona hore ke hlwekile.

²⁶ Ho ya tshepahalang, o a tshepahala; ho ya se nang kodi, o hloka kodi.

²⁷ Ho ya hlwekileng, o hlwekile; empa ho molotsana, o masene.

²⁸ Ke wena ya pholosang setjhaba se hlophehileng, empa o kokobetsa baikgohomosi.

²⁹ Morena, ke wena lebone la ka, Modimo wa ka o bonesa lefifi la ka.

³⁰ Ka thuso ya hao nka thula dira tsa ka, ka thuso ya Modimo wa ka nka tlola lerako.

³¹ Tsela tsa Modimo di phethehile, tshepiso tsa Morena ke tsa nnete; yena ke thebe ya bohle ba tshabelang ho yena.

³² Modimo ke mang, haese Morena? Lefika ke mang, haese Modimo wa rona?

³³ Ke yena Modimo ya mmatlafatsang, ya ntsamaisang tseleng e ntle;

³⁴ ya potlakisang maoto a ka jwaloka a dikgama, ya mpeang hodima dihlaba;

³⁵ yena ya nthutang ho lwana, yena ya nthutang ho hula seqha sa lethose.

³⁶ O nnea thebe ya hao e pholosang, letsoho la hao le letona le a ntshehetsa, paballo ya hao e a nkgodisa.

³⁷ O ntlhekela tsela e batsi, maoto a ka ha a thelle.

³⁸ Ke lelekisa dira tsa ka, ke be ke di tshware; ha ke kgutle ke eso di timetse.

³⁹ Ke a di hlathaka, di sitwa ho tsoha, di wela tlasa maoto a ka.

⁴⁰ O mmatlafaletsa ntwa, ba ntwantshang o ba bea tlasa ka.

⁴¹ O etsa hore dira tsa ka di ntshupe ka direthe, ba ntlhoileng ke a ba timetsa.

⁴² Ba llela thuso, ba hloka mopholosi; ba llela Morena, ha a ba arabe.

⁴³ Ke ba thumisa jwaloka lerole, lerole le fefolwang ke moya, ke ba hatakela jwaloka seretse se tseleng.

⁴⁴ O nnamolela meferefereng ya setjhaba, o nketsa mmusi wa ditjhaba; ditjhaba di a ntshebeletsa, ditjhaba tseo ke neng ke sa di tsebe.

⁴⁵ Hang ha di nkutlwa di a mmamela; di ipea tlasa puso ya ka ha di mpona.

⁴⁶ Ditjhaba di kgathala matla, di tswa di thothomela qhobosheaneng tsa tsona.

⁴⁷ Modimo o a phela! Ho bokwe Lefika la ka! Modimo, mopholosi wa ka, a ke a thoholetswe!

⁴⁸ Modimo ya ntshitsang ka diphetetso, ya beang ditjhaba tlasa ka.

⁴⁹ O nnamolela direng tsa ka, o mphahamisetsa kahodimo, kahodimo ho ba ntwantshang, o nnamolela diatleng tsa ya sehloho.

⁵⁰ Ka baka leo, ke tla o boka hara ditjhaba, ke roke lebitso la hao Morena,

⁵¹ wena ya neang kgosi ya hao, ya e neang tlholo e kgolo, ya bontshang mohau ho motlotsuwa wa hao, ho Davida le ditloholo tsa hae kamehla le mehla.