Dipesaleme 16 - BIBELE

Ho tshepa Morena

¹ Pesalema ya Davida. Ako mpaballe Modimo, hobane ke tshabela ho wena.

² Ke re ho Morena: “Ke wena Morena wa ka, ha ke na lehlohonolo ntle ho wena.”

³ Ha e le medimo ya bohata e lefatsheng, ba kgahlwang ke yona ba rohakehile.

⁴ Ba mathang kamora yona ba ipakela mahlomola; nke ke ka e etsetsa nyehelo ya madi, esita le ho bolela mabitso a yona, ho a bolela ka molomo wa ka.

⁵ Morena, ke wena lefa la ka le mohope wa ka; tseo ke nang le tsona di tswa ho wena.

⁶ Ke sehetswe kgubung, ruri ke thabela lefa la ka.

⁷ Ke tla boka Morena, moeletsi wa ka; le bosiu pelo ya ka e a ntemosa.

⁸ Kamehla ke ntse ke hopotse Morena, hobane o ka tsohong la ka le letona, nke ke ka sisinngwa.

⁹ Kahoo pelo ya ka e thabile, moya wa ka o nyakaletse, le wona mmele wa ka o tla phomola, o tla phomola o phutholohile;

¹⁰ o ke ke wa ntlohela Nqalong ya Bafu, o ke ke wa lesela motshepuwa wa hao, wa mo lesella ho bolla lebitleng.

¹¹ O tla mpontsha tsela ya bophelo; thabo e kgaphatsehang e fumanwa ho wena, ho ba ka tsohong la hao le letona ke monyaka o sa feleng.