Dipesaleme 145 - BIBELE

Boholo ba Modimo le molemo wa hae

¹ Pesalema ya Davida. Thoko. Ke tla o tumisa, wena Modimo wa ka o leng Kgosi ya ka, ke boke lebitso la hao kamehla le mehla.

² Ke tla o boka ka letsatsi le leng le le leng, ke rorise lebitso la hao kamehla le mehla.

³ Morena o moholo, o lokelwa ke thoriso e kgolo, boholo ba hae ha bo fihlelwe.

⁴ Moloko ho isa molokong o mong o tlotlisa mesebetsi ya hao, o bonahatsa ketso tsa bonatla ba hao.

⁵ Batho ba tla bolela kganya ya tlotla ya hao, nna ke nahane dimakatso tsa hao.

⁶ Ba tla bolela matla a ketso tsa hao tse tshabehang, nna ke phete tsa boholo ba hao.

⁷ Ba tla etsa kgopotso ya molemo wa hao o moholo, ba etsetse ho loka ha hao ditlatse.

⁸ Morena o mosa, o na le kutlwelobohloko, o dieha ho halefa, o tletse mohau.

⁹ Morena o molemo ho bohle, lerato la hae le aparela mesebetsi yohle ya hae.

¹⁰ Morena, mesebetsi yohle ya hao e a o leboha, le batshepuwa ba hao ba a o boka;

¹¹ ba bolela tlotla ya mmuso wa hao, ba bua ka diketso tsa bonatla ba hao.

¹² Ba tsebisa batho bohle diketso tsa bonatla ba hao, le tlotla e kganyang ya mmuso wa hao.

¹³ Mmuso wa hao ke mmuso wa kamehla yohle, le puso ya hao ke ya meloko yohle. Morena o tshepahala dipolelong tsohle tsa hae, o mohau mesebetsing yohle ya hae.

¹⁴ Morena o tshehetsa bohle ba wang, o phahamisa bohle ba kgokgopaneng.

¹⁵ Mahlo a bohle a lebeletse wena, hore o ba fepe ka nako e lokelang.

¹⁶ Ha o fuparolla seatla, o kgorisa tsohle tse phelang ka tseo di di lakatsang.

¹⁷ Morena o lokile ho tsohle tseo a di etsang, mesebetsing yohle ya hae o mohau.

¹⁸ Morena o haufi le bohle ba mo rapelang, ba mo rapelang kannete.

¹⁹ O phetha ditakatso tsa ba mo tshabang, o utlwa sello sa bona, mme o a ba pholosa.

²⁰ Morena o baballa bohle ba mo ratang, empa bohle ba kgopo o a ba timetsa.

²¹ Molomo wa ka o ke o rorise Morena; batho bohle ba boke lebitso la hae le halalelang, ba le boke kamehla le mehla.