Dipesaleme 139 - BIBELE

Modimo o tseba tsohle

¹ Pesalema ya Davida, e qapetsweng motsamaisi wa dibini. Morena, o ntlhahlobile, o a ntseba.

² O tseba ha ke dula le ha ke ema, o hlalohanya mehopolo ya ka, o e hlalohanya ke sa le hole.

³ O ntisa ha ke tsamaya le ha ke robetse, o tsebisisa metsamao ya ka yohle.

⁴ Lentswe le eso be teng lemeng la ka, o se o le tseba hantle, Morena.

⁵ O ntlhahile kamahohle, o beile letsoho la hao hodima ka.

⁶ Tsebo ena e makatsang e a mpheta; e tebile hoo nke keng ka e fihlela.

⁷ Nka ya kae ho ipatela moya wa hao? Nka balehela kae ho ipatela sefahleho sa hao?

⁸ Ha nka nyolohela mahodimong, o teng moo; leha nka theohela Nqalong ya Bafu, le teng o teng.

⁹ Leha nka adima mapheo a mafube, ka ya aha dipheletsong tsa lewatle,

¹⁰ le hona moo letsoho la hao le tla ntsamaisa, letsoho la hao le letona le tla ntshwara.

¹¹ Leha nka re: “Ruri lefifi le tla mpata, lesedi le nteetseng hare le tla fetoha bosiu,”

¹² empa ho wena lefifi hase lefifi, bosiu bo kganya jwaloka letsatsi, lefifi le jwaloka lesedi.

¹³ Ke wena ya bopileng bokahare ba ka, ya kopantseng ditho tsa ka ke sa le popelong ya mme.

¹⁴ Ke a o boka, hobane o mpopile ka mokgwa o makatsang; mesebetsi ya hao e a hlolla, hona ke ho tseba hantle.

¹⁵ Masapo a ka a ne a sa pateha ho wena, ha ke ne ke bopjwa sephiring, ke kopanngwa ditho ke le botebong ba lefatshe.

¹⁶ Mahlo a hao a mpone ke eso tswalwe; tsohle tsa ka di ne di se di ngotswe bukeng ya hao, le pele ke eba teng.

¹⁷ Modimo, mehopolo ya hao e thata hakaakang! Palo ya yona e kgolo hakaakang!

¹⁸ Ha nka e bala, e mengata ho feta lehlabathe; ha nka e qeta, o ntse o ena le nna.

¹⁹ Oho, Modimo, hoja wa timetsa ba kgopo, hoja ba tshollang madi ba suthela hole le nna!

²⁰ Ke ba buang hampe ka wena, ba o lwantshetsang lefeela.

²¹ Na nke ke ka hloya ba o hloileng, Morena, ka halefela ba o tsohelang matla?

²² Ke ba hloile ka lehloyo le phethehileng, le nna ke dira tsa ka.

²³ Ntlhahlobe, Modimo, o tsebe pelo ya ka; o nnonye maikutlo, o tsebe mehopolo ya ka;

²⁴ o bone hore na ke tseleng e mpe, o ntsamaise tseleng ya kamehla yohle.