Dipesaleme 136 - BIBELE

Bokang Morena, hobane o molemo

¹ Haleluja! Bokang Morena, hobane o molemo; mohau wa hae ke wa kamehla yohle.

² Bokang Modimo wa medimo; mohau wa hae ke wa kamehla yohle.

³ Bokang Morena wa marena; mohau wa hae ke wa kamehla yohle.

⁴ Ke yena a inotshi ya entseng dimakatso tse kgolo; mohau wa hae ke wa kamehla yohle.

⁵ Ke yena ya entseng mahodimo, a a etsa ka bohlale; mohau wa hae ke wa kamehla yohle.

⁶ O adile lefatshe hodima metsi; mohau wa hae ke wa kamehla yohle.

⁷ O entse masedi a maholo; mohau wa hae ke wa kamehla yohle;

⁸ letsatsi ho busa motsheare; mohau wa hae ke wa kamehla yohle;

⁹ kgwedi le dinaledi ho busa bosiu; mohau wa hae ke wa kamehla yohle.

¹⁰ Ke yena ya ileng a bolaya, a bolaya matsibolo a Egepeta; mohau wa hae ke wa kamehla yohle.

¹¹ A ntsha Iseraele naheng ya Egepeta; mohau wa hae ke wa kamehla yohle;

¹² ka letsoho le matla le sephaka se otlolohileng; mohau wa hae ke wa kamehla yohle.

¹³ O ile a phatlola Lewatle la Sufe koto tse pedi; mohau wa hae ke wa kamehla yohle.

¹⁴ A tshedisa Iseraele hara lona; mohau wa hae ke wa kamehla yohle.

¹⁵ A dihela Faro le mabotho a hae, a a dihela Lewatleng la Sufe; mohau wa hae ke wa kamehla yohle.

¹⁶ Ke yena ya ileng a tsamaisa setjhaba, a tsamaisa tjhaba sa hae lehwatateng; mohau wa hae ke wa kamehla yohle.

¹⁷ O ile a timetsa dikgosi tse kgolo; mohau wa hae ke wa kamehla yohle.

¹⁸ A bolaya dikgosi tse matla; mohau wa hae ke wa kamehla yohle:

¹⁹ Sihone, kgosi ya Baamore; mohau wa hae ke wa kamehla yohle;

²⁰ le Oge, kgosi ya Bashane; mohau wa hae ke wa kamehla yohle.

²¹ A fana ka naha ya bona hore e be lefa; mohau wa hae ke wa kamehla yohle;

²² e be lefa la Iseraele, mohlanka wa hae; mohau wa hae ke wa kamehla yohle.

²³ Ke yena ya ileng a re hopola ha re ne re kokobeditswe; mohau wa hae ke wa kamehla yohle.

²⁴ A re phamola ho dira tsa rona; mohau wa hae ke wa kamehla yohle.

²⁵ Ke yena ya fepang dibopuwa tsohle; mohau wa hae ke wa kamehla yohle.

²⁶ Bokang Modimo wa mahodimo; mohau wa hae ke wa kamehla yohle.