Dipesaleme 132 - BIBELE

Thoko ya Ntlo ya Modimo le tshepiso ya Morena ho Davida

¹ Sefela sa ho nyolohela Jerusalema. Morena, ako hopole Davida, le ho hlopheha hohle ha hae,

² kamoo a neng a hlapanye, a hlapanyetsa Morena kateng, a ikana ho Ya Matla, Modimo wa Jakobo,

³ a re: “Nke ke ka kena ka tlung ya ka, kapa ka paqama diphateng tsa ka;

⁴ mahlo a ka a ke ke a fumana boroko, le dintshi tsa ka di ke ke tsa tutubala,

⁵ ho fihlela ke fumanela Morena sebaka, ke fumanela Ya Matla Leaho, Ya Matla, Modimo wa Jakobo.”

⁶ Areka re e utlwetse Eferata, ra e fumana masimong a Jaare.

⁷ A re keneng ka Leahong la hae, re itihele kapele ho yena.

⁸ Tloo, Morena, o ye sebakeng sa hao sa phomolo, wena le areka e bontshang matla a hao.

⁹ Baprista ba hao ba apeswe ho loka, batshepuwa ba hao ba etse ditlatse.

¹⁰ Ka baka la mohlanka wa hao Davida, o se ke wa furalla Motlotsuwa wa hao.

¹¹ Morena o ile a hlapanyetsa Davida, a ke ke a kwenehela tshepiso, tshepiso ena ya nnete, a re: “E mong wa bana ba theka la hao, ke tla mmea teroneng ya hao.

¹² Ha bara ba hao ba ka boloka selekane sa ka, ba latela ditemoso tseo ke ba neileng tsona, le bara ba bona ba tla dula teroneng, teroneng ya hao kamehla.”

¹³ Morena o ikgethetse Sione, o ratile hore e be leaho la hae;

¹⁴ a re: “Sena ke sebaka sa ka sa phomolo sa kamehla, ke tla aha mona hobane ke ratile jwalo.

¹⁵ Ke tla hlohonolofatsa Sione ka nala, mafutsana a yona ke a fepe, ke a fepe, a kgore.

¹⁶ Baprista ba yona ke tla ba apesa pholoho, batshepuwa ba yona ba etse ditlatse.

¹⁷ “Teng ke tla bea setloholo sa Davida, ke se bee hore e be kgosi e matla, ke lokisetse Motlotsuwa wa ka lebone.

¹⁸ Dira tsa hae ke tla di apesa dihlong; athe yena hloohong ya hae ho tla kganya mofapahlooho wa hae.”