Dipesaleme 13 - BIBELE

Thapelo ya ho ikopela thuso

¹ Pesalema ya Davida, e qapetsweng motsamaisi wa dibini.

² Morena, o tla nne o ntebale ho fihlela neng? O tla mpatela sefahleho sa hao ho fihlela neng?

³ Ke ho fihlela neng moya wa ka o tla utlwa bohloko, le pelo ya ka e hlomohe ka matsatsi wohle? Sera sa ka se tla ntlhola ho fihlela neng?

⁴ Morena Modimo wa ka, tadima, o nkarabe hle; ako edise mahlo a ka, esere ka roballa ruri,

⁵ sera sa ka sa tshoha se re: “Ke mo hlotse,” le ba ntwantshang ba thabela ho wa ha ka.

⁶ Ha e le nna, ke tshepile mohau wa hao; pelo ya ka e ke e nyakalle hobane o mpholositse.

⁷ A nke ke binele Morena, hobane o nketseditse tse molemo.