Dipesaleme 119 - BIBELE

Thoko ya Molao wa Morena Alef

¹ Ho lehlohonolo ba metsamao e se nang kodi, ba tsamayang ka Molao wa Morena.

² Ho lehlohonolo ba latelang ditemoso tsa hae, ba mmatlang ka pelo tsohle tsa bona;

³ ba sa etseng tse sa lokang, ba mpang ba tsamaya ditseleng tsa hae.

⁴ O re neile ditaelo tsa hao, hore re di boloke ka ho tlala.

⁵ Eka nka tiya metsamaong ya ka, ka phetha thato ya hao.

⁶ Nke ke ka hlajwa ke dihlong, ha ke hlokomela melao yohle ya hao.

⁷ Ke tla o boka ka pelo e hlwekileng, ha ke se ke ithutile dikahlolo tsa hao tse lokileng.

⁸ Ke tla phetha thato ya hao, o se ke wa ntahlela ruri.

Beth

⁹ Mohlankana a ka hlwekisa metsamao ya hae jwang? Ka ho hahela lentswe la hao lesaka.

¹⁰ Ke o batla ka pelo ya ka yohle; se ntumelle ho kgeloha, ho kgeloha melao ya hao.

¹¹ Ke bolokile tshepiso ya hao, ka e boloka ka pelong ya ka, hore ke se ke ka o sitelwa.

¹² Ho bokwe wena Morena; ako nthute thato ya hao.

¹³ Ka molomo wa ka ke bolela dikahlolo tsohle tse tswang molomong wa hao.

¹⁴ Ke thabela ho latela ditemoso tsa hao, ho feta maruo wohle.

¹⁵ Ke tla nahana ditaelo tsa hao, ke imamelle ditsela tsa hao.

¹⁶ Ke thabela ho phetha thato ya hao, nke ke ka lebala lentswe la hao.

Gimel

¹⁷ Etsetsa mohlanka wa hao tse molemo, ke tle ke phele, ke mamele lentswe la hao ka hloko.

¹⁸ Ntutubolle mahlo, ke bone dimakatso tsa Molao wa hao.

¹⁹ Ke mofeti mona lefatsheng; o se ke wa mpatela melao ya hao.

²⁰ Moya wa ka o ngongorehela dikahlolo tsa hao ka nako tsohle.

²¹ O kgalemela baikgohomosi, baikgohomosi ba rohakehileng, ba kgelohang melao ya hao.

²² Ako tlose sekgobo le nyediso ho nna, hobane ke latela ditemoso tsa hao.

²³ Leha mahosana a kopane, a kopanetse ho nthera, nna, mohlanka wa hao, ke nahana thato ya hao.

²⁴ E, ditemoso tsa hao di a nthabisa, ke baeletsi ba ka.

Daleth

²⁵ Ke rapaletse leroleng; ako nnee bophelo ho ya ka lentswe la hao.

²⁶ Ke o boleletse metsamao ya ka, wa nkaraba; ako nthute thato ya hao.

²⁷ Nthute, ke utlwisise tsela ya ditaelo tsa hao, ke tle ke nahane dimakatso tsa hao.

²⁸ Moya wa ka o lliswa ke maswabi; ako mmatlafatse ho ya ka lentswe la hao.

²⁹ Nqobise tsela ya leshano, o nkgauhele ka ho nthuta Molao wa hao.

³⁰ Ke ikgethetse tsela ya nnete, dikahlolo tsa hao ke di hlokometse.

³¹ Ke kgomaretse ditemoso tsa hao; oho, Morena, ke se ke ka hlajwa ke dihlong.

³² Ke tla matha tseleng ya melao ya hao, hobane wena o ntokolotse.

He

³³ Morena, nthute ho tsamaya ho ya ka thato ya hao, ke tle ke e latele ho isa qetellong.

³⁴ Nnee kutlwisiso ke tle ke hlomphe Molao wa hao, ke o boloke ka pelo ya ka yohle.

³⁵ Ntsamaise tseleng ya melao ya hao, hobane ke a e thabela.

³⁶ Ruta pelo ya ka ditemoso tsa hao, ho ena le ho rata maruo.

³⁷ Faposa mahlo a ka, a se ke a bona tsa mafeela, o nnee bophelo tseleng ya hao.

³⁸ Phethisetsa mohlanka wa hao tshepiso eo o e etseditseng ba o tshabang.

³⁹ Ntlose sekgobo seo ke se tshabang, hobane dikahlolo tsa hao di lokile.

⁴⁰ Ke lakatsa ditaelo tsa hao; ako nnee bophelo ka ho loka ha hao.

Vaw

⁴¹ Morena, ako ntshitse ka mohau wa hao, o mpholose ho ya ka tshepiso ya hao;

⁴² ke tle ke tsebe ho araba ba nnyefolang, hobane ke tshepile lentswe la hao.

⁴³ Nthuse, ke bue nnete feela, hobane ke tshepile dikahlolo tsa hao.

⁴⁴ Ke tla nne ke boloke Molao wa hao, ke o boloke kamehla le mehla.

⁴⁵ Ke tla phela ka bolokolohi, hobane ke thahasella ditaelo tsa hao.

⁴⁶ Ke tla bua ka ditemoso tsa hao, ke bue ka tsona kapele ho dikgosi, ke sa hlajwe ke dihlong.

⁴⁷ Ke thabela melao ya hao, mme ke e rata haholo.

⁴⁸ Ke tla hlompha melao ya hao, ke nahane thato ya hao.

Zayin

⁴⁹ Hopola lentswe leo o le buileng, wa le bua ho mohlanka wa hao, hobane le nneile tshepo.

⁵⁰ Ho hlopheheng ha ka se ntshedisang ke sena: Tshepiso ya hao e nnea bophelo.

⁵¹ Baikgohomosi ba ntlaka haholo, empa ha ke furalle Molao wa hao.

⁵² Morena, ke hopola dikahlolo tsa hao, kahlolo tsa hao tsa boholoholo, mme ke a tshediseha.

⁵³ Ke halefiswa haholo ke ba kgopo, ba furallang Molao wa hao.

⁵⁴ Thato ya hao ke pina ho nna, fatsheng lena leo ke leng mofeti ho lona.

⁵⁵ Bosiu ke hopola lebitso la hao, lebitso la hao Morena, mme ke boloka Molao wa hao.

⁵⁶ Lehlohonolo la ka ke lena: Ke bolokile ditaelo tsa hao.

Heth

⁵⁷ Morena, ke itse kabelo ya ka ke ho mamela mantswe a hao ke a mamele ka hloko.

⁵⁸ Ke o rapela ka pelo ya ka yohle: Ako nkgauhele ho ya ka tshepiso ya hao.

⁵⁹ Ke hlahlobile metsamao ya ka, mme ke kgutletse tseleng eo o mpontshitseng yona.

⁶⁰ Ke ile ka potlaka, ka se ke ka dieha ho boloka melao ya hao.

⁶¹ Le hoja maraba a ntshwasitse, maraba a ba kgopo a ntshwasitse, ha ke a lebala Molao wa hao.

⁶² Ke tsoha ka seroko ho o boka, ka baka la kahlolo tsa hao, kahlolo tse lokileng.

⁶³ Ke motswalle wa bohle ba o tshabang, le wa ba bolokang ditaelo tsa hao.

⁶⁴ Lefatshe lohle le tletse mohau wa hao, Morena; ako nthute thato ya hao.

Teth

⁶⁵ Morena, o entse tse molemo, wa di etsetsa mohlanka wa hao, ho ya ka lentswe la hao.

⁶⁶ Nthute bohlale le tsebo, hobane ke tshepa melao ya hao.

⁶⁷ Pele ke eso kokobetswe ke ne ke kgelohile; jwale ke hlokometse tshepiso ya hao.

⁶⁸ Wena o molemo, o etsa tse molemo; ako nthute thato ya hao.

⁶⁹ Le hoja baikgohomosi ba nneta ka leshano, ke tla boloka ditaelo tsa hao, ke di boloke ka pelo ya ka yohle.

⁷⁰ Pelo tsa bona di tsherehane, empa nna ke thabela Molao wa hao.

⁷¹ Ke hantle ha ke ile ka kokobetswa, ke tle ke ithute thato ya hao.

⁷² Ho molemo ho nna ho ba le Molao o tswang ho wena, ho ena le ho ba le diketekete tsa tjhelete ya kgauta le ya silefera.

Yod

⁷³ O mpopile ka matsoho a hao, wa nnea sebopeho; ako nnee kutlwisiso, ke tle ke ithute melao ya hao.

⁷⁴ Ba o tshabang ba tla mpona, ba mpone ba thabe, hobane ke tshepile lentswe la hao.

⁷⁵ Morena, ke a tseba hore dikahlolo tsa hao di lokile; mme leha o nkokobeditse, wena o a tshepahala.

⁷⁶ Mohau wa hao o ke o ntshedise, ho ya ka tshepiso eo o e entseng, wa e etsetsa mohlanka wa hao.

⁷⁷ Lerato la hao le ke le nketele, ke tle ke phele, hobane ke thabela Molao wa hao.

⁷⁸ Baikgohomosi ba ntubang, ba ntubang ka mashano, ba ke ba hlajwe ke dihlong, empa nna ke tla nahana ditaelo tsa hao.

⁷⁹ Ba o tshabang ba ke ba kgutlele ho nna, le ba tsebang ditemoso tsa hao.

⁸⁰ Pelo ya ka e ke e phethe thato ya hao ka ho tlala, ke tle ke se ke ka hlajwa ke dihlong.

Kaph

⁸¹ Moya wa ka o ngongorehela ho pholoswa ke wena, ke tshepile lentswe la hao.

⁸² Mahlo a ka a motela ke ho lebella tshepiso ya hao, ke re: “Ekaba o tla ntshedisa neneng?”

⁸³ Le hoja ke le jwaloka lekuka, lekuka le ka mosing, ha ke a lebala thato ya hao.

⁸⁴ Mohlanka wa hao o sa tla phela ho le hokae? Bahlorisi ba ka o tla ba ahlola neng?

⁸⁵ Baikgohomosi ba ntjheketse mamena; bona ba sa yeng ka Molao wa hao.

⁸⁶ Melao ya hao yohle ke ya nnete; empa bona ba ntlhorisa ka mashano, ako nthuse.

⁸⁷ Ba batile ba ntlosa lefatsheng, empa ha ke a furalla ditaelo tsa hao.

⁸⁸ Ako nnee bophelo ka mohau wa hao, ke latele ditemoso tse tswang ho wena.

Lamed

⁸⁹ Morena, lentswe la hao ke la mehla yohle, le tiile jwaloka mahodimo.

⁹⁰ Botshepehi ba hao ke ba meloko yohle, o theile lefatshe, mme le tsitsitse.

⁹¹ Ho ya ka dikahlolo tsa hao, tsohle di ntse di tiile: Dintho tsohle di a o sebeletsa.

⁹² Hoja Molao wa hao e ne e se thabo ya ka, nka be ke timeditswe ke ho hlopheha ha ka.

⁹³ Nke ke ka lebala ditaelo tsa hao le ka mohla, hobane ke ka tsona o nneang bophelo.

⁹⁴ Ke wa hao, ako mpholose, hobane ke thahasella ditaelo tsa hao.

⁹⁵ Ba kgopo ba ntaletse hore ba ntimetse, empa ke hlokometse ditemoso tsa hao.

⁹⁶ Ke bone hore tsohle tse phethehileng di na le bofelo, empa Molao wa hao ha o na moedi.

Mem

⁹⁷ Molao wa hao ke o rata hakaakang! ke o nahana letsatsi lohle.

⁹⁸ Molao wa hao o ntlhalefisa ho feta dira tsa ka, hobane ke na le wona kamehla yohle.

⁹⁹ Ke hlalefile ho feta bohle ba nthutileng, hobane ke nahana ditemoso tsa hao.

¹⁰⁰ Ke feta maqheku ka kutlwisiso, hobane ke boloka ditaelo tsa hao.

¹⁰¹ Ke qobisa maoto a ka ditsela tsohle tse kgopo, ke tle ke mamele lentswe la hao ka hloko.

¹⁰² Ha ke furalle dikahlolo tsa hao, hobane ke wena ya nthutileng tsona.

¹⁰³ Ditshepiso tsa hao di latsweha hamonate hakaakang! Di feta mahe a dinotshi ka hanong la ka.

¹⁰⁴ Ke na le kutlwisiso ka baka la ditaelo tsa hao, ka baka leo, ke hloile ditsela tsohle tsa leshano.

Nun

¹⁰⁵ Lentswe la hao ke lebone maotong a ka, ke lesedi tseleng ya ka.

¹⁰⁶ Ke ikanne, ke eme ke tiile: Ke tla ya ka kahlolo tsa hao, kahlolo tsa hao tse lokileng.

¹⁰⁷ Ke kokobeditswe ka ho fetisisa; oho, Morena, ako nnee bophelo ho ya ka lentswe la hao.

¹⁰⁸ Morena, amohela diteboho tse tswang molomong wa ka, o nthute dikahlolo tsa hao.

¹⁰⁹ Bophelo ba ka bo kotsing kamehla, empa ha ke lebale Molao wa hao.

¹¹⁰ Ba kgopo ba ntjhehetse leraba, empa ha ke kgelohe ditaelo tsa hao.

¹¹¹ Ditemoso tsa hao ke lefa la ka la mehla yohle, ke thabo ya pelo ya ka.

¹¹² Ke rerile ka pelong ya ka ho phetha thato ya hao kamehla, ho e phetha ho isa qetellong.

Samek

¹¹³ Ke hloile bo-temepedi, ke rata Molao wa hao.

¹¹⁴ O setshabelo sa ka le thebe ya ka, ke tshepile lentswe la hao.

¹¹⁵ Tlohang ho nna, lona ba etsang bobe, ke boloke melao ya Modimo wa ka.

¹¹⁶ Mmatlafatse ho ya ka tshepiso ya hao, ke tle ke phele; o se ke wa ntshwabisa, hobane ke o tshepile.

¹¹⁷ Nthuse, ke tle ke pholohe, ke nne ke thabele ho phetha thato ya hao.

¹¹⁸ O nyedisa bohle ba kgelohang thato ya hao, hobane masene a bona ke lefeela.

¹¹⁹ Bohle ba lefatshe ba kgopo o ba tadima e le manya, kahoo ke rata ditemoso tsa hao.

¹²⁰ Mmele wa ka o thothomela ke ho o tshaba, mme ke tshohile dikahlolo tsa hao.

Ayin

¹²¹ Ke phethile toka le ho lokileng; o se ke wa ntlohella matsohong a bahatelli ba ka.

¹²² Sireletsa mohlanka wa hao, mohlanka wa hao a tle a atlehe, baikgohomosi ba se ke ba mo hatella.

¹²³ Mahlo a ka a motela ke ho lebella ho pholosa ha hao, le ho lebella tshepiso ya hao, tshepiso ya hao e lokileng.

¹²⁴ Tshwara mohlanka wa hao hantle ho ya ka mohau wa hao, o nthute thato ya hao.

¹²⁵ Ke mohlanka wa hao, ako nnee kutlwisiso, ke tle ke tsebe ditemoso tsa hao.

¹²⁶ Morena, ke nako ya hore o sebetse, hobane ba tlotse Molao wa hao.

¹²⁷ Ruri ke rata melao ya hao, ke e rata ho feta kgauta, le hona kgauta e hlwekisitsweng;

¹²⁸ kahoo ke latela ditaelo tsa hao tsohle, ke hloile ditsela tsohle tsa leshano.

Pe

¹²⁹ Ditemoso tsa hao di a tsoteha, ke ka hoo ke di latelang.

¹³⁰ Qaqiso ya mantswe a hao e a edisa, ba hlokang mano e ba nea kutlwisiso.

¹³¹ Ke ahlamisa molomo wa ka, ke sisa pelo ke ho labalabela melao ya hao.

¹³² Retelehela ho nna, o nkgauhele, jwalokaha ho lokela ba ratang lebitso la hao.

¹³³ Matlafatsa mehato ya ka ho ya ka tshepiso ya hao, o se dumelle hore ke buswe ke bobe.

¹³⁴ Ntopolle ho batho ba nkgatellang, ke tle ke boloke ditaelo tsa hao.

¹³⁵ Ako bontshe mohlanka wa hao fahleho se kganyang kgotso, o nthute thato ya hao.

¹³⁶ Marameng a ka ho keleketla dikeledi, hoba ha ho ya bolokang Molao wa hao.

Sade

¹³⁷ Morena, wena o lokile, le dikahlolo tsa hao di nepahetse.

¹³⁸ Temoso tseo o faneng ka tsona di lokile, di tshepahala haholo.

¹³⁹ Tjheseho ya ka e a nqeta, hobane ba ntlhoileng ba lebala mantswe a hao.

¹⁴⁰ Tshepiso ya hao ke ya nnetenete, mohlanka wa hao o a e rata.

¹⁴¹ Ke monyenyane, ke a nyediseha, empa ditaelo tsa hao ha ke di lebale.

¹⁴² Ho loka ha hao ke ho loka ha kamehla, Molao wa hao ke nnete.

¹⁴³ Ke fihletswe ke matshwenyeho, ke fihletswe ke matswalo, empa melao ya hao ke thabo ya ka.

¹⁴⁴ Ditemoso tsa hao di lokile kamehla; ako nnee kutlwisiso, ke tle ke phele.

Koph

¹⁴⁵ Morena, ke a ipiletsa, ke ipiletsa ka pelo ya ka yohle, ako nkarabe; ke tle ke phethe thato ya hao.

¹⁴⁶ Ke ipiletsa ho wena, ako mpholose; ke tle ke latele ditemoso tsa hao.

¹⁴⁷ Ke tsoha e sa le ka madungwadungwana, ke lle ho wena, hobane ke tshepile mantswe a hao.

¹⁴⁸ Ke lala ke fadimehile ka nako tsa bosiu, ke ntse ke nahana tshepiso ya hao.

¹⁴⁹ Morena, mamela lentswe la ka, o le mamele ka baka la mohau wa hao, o nnee bophelo ho ya ka kahlolo ya hao.

¹⁵⁰ Bahlorisi ba bolotsana ba a atamela, bona ba holehole le Molao wa hao.

¹⁵¹ Wena Morena, o haufi, mme melao yohle ya hao ke nnete.

¹⁵² Kgale ke tsebile hore ditemoso tsa hao o di tiisitse, e be tsa mehla yohle.

Resh

¹⁵³ Ako tadime ho hlopheha ha ka, o nnamolele, hobane ha ke a lebala Molao wa hao.

¹⁵⁴ Ako emele nyewe ya ka, o ntopolle; o nnee bophelo ho ya ka tshepiso ya hao.

¹⁵⁵ Pholoho e holehole le ba kgopo, hobane ha ba batle thato ya hao.

¹⁵⁶ Lerato la hao le leholo, Morena; ako nnee bophelo ho ya ka dikahlolo tsa hao.

¹⁵⁷ Ba bangata ba ntlhorisang, le ba ntwantshang ba bangata, empa ha ke furalle ditemoso tsa hao.

¹⁵⁸ Ha ke bona bakwenehi ke a teneha, hoba tshepiso ya hao, ha ba e hlokomele.

¹⁵⁹ Morena, bona kamoo ke ratang ditaelo, ke ratang taelo tsa hao kateng! Ako nnee bophelo ho ya ka mohau wa hao.

¹⁶⁰ Nnete ke moko wa lentswe la hao, dikahlolo tsohle tsa hao ke tse lokileng, ke tsa mehla yohle.

Shin

¹⁶¹ Mahosana a ntlhorisa ntle ho lebaka, empa pelo ya ka e tshoswa ke lentswe la hao feela.

¹⁶² Ke thabela tshepiso ya hao, jwaloka ya fumaneng kgapo, kgapo e ngata.

¹⁶³ Leshano ke le hloile, ke a le nyonya; Molao wa hao wona ke a o rata.

¹⁶⁴ Ke o rorisa hasupa ka letsatsi, ka baka la kahlolo tsa hao, kahlolo tse lokileng.

¹⁶⁵ Ba ratang Molao wa hao ba na le kgotso e phethehileng, ha ho na se ka ba kgopang.

¹⁶⁶ Morena, ke lebeletse hore o mpholose, ke tle ke phethe melao ya hao.

¹⁶⁷ Ke latela ditemoso tsa hao, ke di rata haholo.

¹⁶⁸ Ke boloka ditaelo tsa hao, le ditemoso tsa hao ke a di boloka, hobane o bona metsamao ya ka yohle.

Taw

¹⁶⁹ Morena, sello sa ka se ke se finyelle ho wena; ako nnee kutlwisiso ho ya ka lentswe la hao.

¹⁷⁰ Thapelo ya ka e ke e fihle ho wena; ako nnamolele ho ya ka tshepiso ya hao.

¹⁷¹ Molomo wa ka o bolela dithoko tsa hao, hobane o nthuta thato ya hao.

¹⁷² Leleme la ka le ke le bine tsa tshepiso ya hao, hoba melao yohle ya hao e lokile.

¹⁷³ Letsoho la hao le ke le nthuse, hoba ke ikgethetse ditaelo tsa hao.

¹⁷⁴ Morena, ke lakatsa ho pholoswa, ho pholoswa ke wena; Molao wa hao ke thabo ya ka.

¹⁷⁵ A nke ke phelele ho o rorisa, dikahlolo tsa hao di ke di nthuse.

¹⁷⁶ Ke lelera jwaloka nku e lahlehileng; ako batle mohlanka wa hao, hobane ha ke lebale melao ya hao.