Dipesaleme 118 - BIBELE

Thapelo ya teboho

¹ Bokang Morena, hobane o molemo; mohau wa hae ke wa kamehla yohle.

² Iseraele a ke a re: “Mohau wa hae ke wa kamehla yohle.”

³ Ba ntlo ya Arone ba ke ba re: “Mohau wa hae ke wa kamehla yohle.”

⁴ Ba tshabang Morena ba ke ba re: “Mohau wa hae ke wa kamehla yohle.”

⁵ Ha ke ne ke patisitswe, ka ipiletsa ho Morena; Morena a nkarabela, a ntokolla.

⁶ Morena o na le nna, ha ke tshabe letho; motho a ka nketsang?

⁷ Morena o na le nna, ke mothusi wa ka, ke tella ba ntlhoileng.

⁸ Ho molemo ho tshabela ho Morena, ho ena le ho tshepa motho.

⁹ Ho molemo ho tshabela ho Morena, ho ena le ho tshepa mahosana.

¹⁰ Baditjhaba ba ne ba ntikanetse kaofela, empa ka ba tamukanya ka lebitso la Morena.

¹¹ Ba ntikanela, ba ntikanela kamahohle, empa ka ba tamukanya ka lebitso la Morena.

¹² Ba mpokanela jwaloka dinotshi, ba ka malakabe hara dihlahla tsa meutlwa, empa ka ba tamukanya ka lebitso la Morena.

¹³ Ka sutumetswa haholo hoo ke batlileng ke ewa, empa Morena a nthusa.

¹⁴ Morena ke matla a ka le thoko ya ka, ke yena mopholosi wa ka.

¹⁵ Metlotlwaneng ya ba lokileng, ho utlwahala ditlatse tsa tlholo, ho thwe: “Letsoho le letona la Morena le sebeditse tse matla,

¹⁶ letsoho le letona la Morena le a tlotleha, letsoho le letona la Morena le sebeditse tse matla.”

¹⁷ Ha nka ke ka shwa, empa ke tla phela, ke bolele mesebetsi ya Morena.

¹⁸ Morena o nkgalemetse, empa ha a a ka a nneela lefu.

¹⁹ Mpuleleng menyako ya Tempele, ke tle ke kene ka yona, ke boke Morena.

²⁰ Ona ke wona monyako, monyako wa ntlo ya Morena, ba lokileng ba tla kena ka wona.

²¹ Ke a o boka hobane o ile wa nkaraba, o bile mopholosi wa ka.

²² Lejwe le lahlilweng ke dihahi le fetohile lejwe la mantlha;

²³ ke Morena ya entseng hona, mme mahlong a rona ke mohlolo.

²⁴ Lena ke lona letsatsi le entsweng ke Morena; a re nyakalleng, re thabeng ke hona.

²⁵ Oho, Morena, ako re pholose! Oho, Morena, ako re atlehise!

²⁶ Ho bokwe ya tlang ka bitso la Morena: Re le hlohonolofatsa re le ka tlung ya Morena.

²⁷ Morena ke Modimo; o a re bonesetsa. Tshwarang mahlaku, le koloke, le be le yo fihla manakaneng a aletare.

²⁸ O Modimo wa ka, ke a o boka; o Modimo wa ka, ke a o tlotlisa.

²⁹ Bokang Morena, hobane o molemo; mohau wa hae ke wa kamehla yohle.