Dipesaleme 116 - BIBELE

Teboho ya motho ya pholohileng

¹ Ke rata Morena, hobane o utlwile thapedi ya ka,

² a ntshekehela tsebe, mohla ke neng ke ipiletsa ho yena.

³ Marapo a lefu a ne a ntlamile, maraba a Nqalo ya Bafu a ntshwasitse, ka ba matswalong le maswabing.

⁴ Yaba ke rapela lebitso la Morena, ka rapela, ka re: “Oho, Morena, ako pholose bophelo ba ka.”

⁵ Morena o mosa, o lokile, Modimo wa rona o na le kutlwelobohloko.

⁶ Morena o baballa ba hlokang mano, a na a mpholosa ha ke ne ke fokola.

⁷ Moya wa ka, ako boele o kgatholohe, hoba Morena o o etseditse tse molemo.

⁸ O mpholositse lefung, a ntlhakola meokgo, a mphemisa ho kgoptjwa;

⁹ ke tla tsamaya pontsheng ya Morena, lefatsheng la ba phelang.

¹⁰ Ke ne ke ntse ke tshepile, ha ke re: “Ke tshwenyehile haholo.”

¹¹ Pherekanong ya ka ka ba ka re: “Ha ho motho ya tshepahalang!”

¹² Ke tla buseletsa Morena kang, bakeng sa melemo yohle eo a nketseditseng yona?

¹³ Ke tla nyehela ka mohope, hobane ke pholositswe, mme ke rapele lebitso la Morena.

¹⁴ Ke tla phetha dikano tsa ka, ke di phethe ho Morena, pontsheng ya setjhaba sohle sa hae.

¹⁵ Lefu la batshepuwa ba hae ke ntho ya bohlokwa mahlong a Morena.

¹⁶ Ruri, Morena, ke mohlanka wa hao, mora wa lekgabunyane la hao; o tlamolotse ditlamo tsa ka.

¹⁷ Ke tla o nyehella ka sehlabelo sa teboho, mme ke rapele lebitso la Morena.

¹⁸ Ke tla phetha dikano tsa ka, ke di phethe ho Morena, pontsheng ya setjhaba sohle sa hae,

¹⁹ mabaleng a ntlo ya Morena, bohareng ba hao, wena Jerusalema. Haleluja!