Dipesaleme 115 - BIBELE

Modimo wa nnete o mong feela

¹ O se ke wa re nea tlotla, Morena, o se ke wa e nea rona, o mpe o e nee lebitso la hao, ka baka la mohau wa hao le botshepehi ba hao.

² Keng ha baditjhaba ba ka re: “O kae Modimo wa bona?”

³ Modimo wa rona o mahodimong, o etsa tsohle tse mo kgahlang.

⁴ Medimo ya bona ke ya silefera le ya kgauta, ke mosebetsi wa matsoho a batho.

⁵ E na le melomo, empa ha e bue; e na le mahlo, empa ha e bone.

⁶ E na le ditsebe, empa ha e utlwe; e na le dinko, empa ha e fofonele.

⁷ E na le matsoho, empa ha e tshware; e na le maoto, empa ha e tsamaye; ha ho modumo o tswang qoqothong tsa yona.

⁸ Ba e etsang ba ke ba tshwane le yona, ba be jwalo bohle ba e tshepang.

⁹ Lona ba ntlo ya Iseraele, tshepang Morena: Ke yena thuso le thebe ya lona.

¹⁰ Lona ba ntlo ya Arone, tshepang Morena: Ke yena thuso le thebe ya lona.

¹¹ Lona ba tshabang Morena, tshepang Morena: Ke yena thuso le thebe ya lona.

¹² Morena o ntsa re hopotse, o tla re hlohonolofatsa; a hlohonolofatse ba ntlo ya Iseraele, a hlohonolofatse ba ntlo ya Arone,

¹³ a hlohonolofatse bohle, bohle ba tshabang Morena, ba banyenyane mmoho le ba baholo.

¹⁴ Morena a ke a le ngatafatse, lona le bana ba lona.

¹⁵ Morena a ke a le hlohonolofatse, yena ya entseng mahodimo, a etsa le lefatshe.

¹⁶ Mahodimo ke mahodimo a Morena, lefatshe lona o le neile bana ba batho.

¹⁷ Hase bafu ba ka rorisang Morena, leha e le ba theohetseng lebitleng.

¹⁸ Empa ke rona ba phelang ba ka bokang Morena, ho tloha jwale le kamehla yohle. Haleluja!