Dipesaleme 111 - BIBELE

Mesebetsi ya Morena e meholo

¹ Haleluja! Ke tla boka Morena ka pelo ya ka yohle, ke le phuthehong ya ba lokileng.

² Mesebetsi ya Morena e meholo, e fuputswa ke bohle ba e thabelang.

³ Mosebetsi wa hae o bonahatsa tlotla le botlotlehi, ho loka ha hae ho teng kamehla yohle.

⁴ O entse hore dimakatso tsa hae di se ke tsa lebalwa; Morena o mosa, o na le kutlwelobohloko.

⁵ O fepa ba mo tshabang; o hopola selekane sa hae kamehla.

⁶ O bontshitse setjhaba sa hae, a se bontsha matla a mesebetsi ya hae, ka ho se nea lefa la baditjhaba.

⁷ Mesebetsi ya diatla tsa hae e a tshepahala, mesebetsi ya hae e lokile, ditaelo tsohle tsa hae ke tsa nnete;

⁸ di etseditswe mehla yohle, di hlophilwe ka botshepehi le ka ho loka.

⁹ O lopolotse setjhaba sa hae, a laela hore selekane sa hae e be sa kamehla yohle; lebitso la hae le a halalela, mme le a tshabeha.

¹⁰ Qaleho ya bohlale ke ho tshaba Morena, bohle ba sedi ba phela jwalo. O lokelwa ke thoriso kamehla.