Dipesaleme 108 - BIBELE

Thapelo ya ho ikopela thuso ntweng

¹ Pesalema ya Davida. Sefela.

² Pelo ya ka e matlafetse, Modimo; ke tla bina, ke o roke.

³ Tsoha moya wa ka, tsohang, lona thomo le harepa; ke tla tsoha mafube a eso hlahe.

⁴ Morena, ke tla o boka hara ditjhaba, ke o roke hara merabe;

⁵ hobane mohau wa hao o moholo, o fihla mahodimong, le botshepehi ba hao bo fihla marung.

⁶ Modimo, ako bontshe hore o okametse mahodimo, tlotla ya hao e phahamele lefatshe lohle.

⁷ Re pholose ka letsoho la hao le letona, o re utlwe, baratuwa ba hao ba tle ba lopollwe.

⁸ Modimo o buile a le sehalalelong sa hae, a re: “Ke nyakaletse, ke tla arola Shekeme, ke sehe kgohlo ya Sukote dikoto.

⁹ Gileade ke ya ka, le Manase ke ya ka; Efraime ke katiba ya ka ya tshepe, Juda yena ke lere la ka la puso.

¹⁰ Moabe ke lefiso leo ke itlhatswetsang ho lona, Edomo ke tla e hatakela ka seeta; Filesitiya teng ke tla etsa ditlatse, ke etse ditlatse tsa tlholo.”

¹¹ Ke mang ya tla nkisa motseng wa diqhobosheane? Ke mang ya tla mphihlisa Edomo,

¹² ha e le moo wena Modimo, o re lahlile, o se o sa tswe le mabotho a rona?

¹³ Ako re thuse direng tsa rona; hobane thuso ya motho ke lefeela.

¹⁴ Ka thuso ya Modimo re tla lwana senna, ke yena ya tla hatakela dira tsa rona.