Dipesaleme 107 - BIBELE

Setjhaba se leboha Modimo

¹ Bokang Morena, hobane o molemo; mohau wa hae ke wa kamehla yohle.

² Ba ke ba rialo bao Morena a ba lopolotseng, a ba namolela matsohong a mohatelli;

³ a ba phutha, a ba ntsha dinaheng tsa botjhabela le bophirimela, tsa borwa le leboya.

⁴ Ba ne ba phaila lefeelleng, ba phaila lehwatateng, ba sa fumane tsela e yang motseng oo ba ka ahang ho wona,

⁵ ba lapile, ba nyorilwe, ba le lekgatheng la ho idibana.

⁶ Matshwenyehong a bona ba ipiletsa ho Morena, mme a ba lopolla tsietsing ya bona.

⁷ A ba tsamaisa tseleng e otlolohileng, a ba isa motseng oo ba ka ahang ho wona.

⁸ Ba ke ba boke Morena ka baka la mohau wa hae, le dimakatso tsa hae ho bana ba batho.

⁹ O ile a tima lenyora la ba nyorilweng, a kgorisa ba lapileng ka tse molemo.

¹⁰ Ba bang ba ne ba phela lefifing le letsholetsho, ba tlamilwe ke ditlhopheho le ke wona mahlaahlela,

¹¹ hoba ba fetohetse taelo tsa Modimo, ba kgesitse keletso ya Ya Hodimodimo.

¹² A ba kokobetsa ka mesebetsi e boima, ba kgothometseha, ho se ya ka ba thusang.

¹³ Matshwenyehong a bona ba lla ho Morena, mme a ba pholosa tsietsing ya bona.

¹⁴ A ba ntsha lefifing, le bodutung, a kgaola ditlamo tsa bona.

¹⁵ Ba ke ba boke Morena ka baka la mohau wa hae, le dimakatso tsa hae ho bana ba batho.

¹⁶ O ile a pshatla mamati a koporo, a robaka mekwallo ya tshepe.

¹⁷ Ba bang ba thotofatswa ke metsamao ya bona e kgopo, ba hlokofatswa ka baka la melato ya bona,

¹⁸ ba tenwa ke dijo tsohle; ba ne ba se ba le dintshing tsa lefu.

¹⁹ Matshwenyehong a bona ba lla ho Morena, mme a ba pholosa tsietsing ya bona.

²⁰ A laela, mme ba fola, a ba phemisa lebitla.

²¹ Ba ke ba boke Morena ka baka la mohau wa hae, le dimakatso tsa hae ho bana ba batho.

²² Ba nyehele ka mahlabelo a teboho, ba tumise mesebetsi ya hae, ba e tumise ka mehoo ya thabo.

²³ Ba bang ba tsamaya lewatleng ka dikepe, ba hweba ka ho haola mawatle.

²⁴ Le bona ba bone mesebetsi ya Morena, le dimakatso tsa hae madibeng.

²⁵ A laela, ha tsoha sefefo, sa phahamisa maqhubu a lewatle;

²⁶ ba betsetswa hodimodimo, ba theolelwa tlasetlase, ba nyekelwa ke dipelo.

²⁷ Ba tshwarwa ke modikwadikwane, ba thekesela jwaloka matahwa, ba timellwa ke bohlale bohle.

²⁸ Matshwenyehong a bona ba lla ho Morena, mme a ba ntsha tsietsing ya bona.

²⁹ A kgutsisa sefefo, mme maqhubu a kgaotsa ho befa.

³⁰ Ba thaba hobane ho kgutsitse; a ba sesisetsa koung eo ba neng ba leba ho yona.

³¹ Ba ke ba boke Morena ka baka la mohau wa hae, le dimakatso tsa hae ho bana ba batho.

³² Ba mo tlotlise phuthehong ya setjhaba, ba mo rorise mokgatlong wa ba baholo.

³³ O ne a fetole dinoka lehwatata, le didiba a di fetola baka tse omeletseng.

³⁴ Mobu o nonneng a o fetola lenyekethe, ka baka la bokgopo ba baahi ba teng.

³⁵ Lehwatata a le fetola letsha la metsi, naha e tshehla a e fetola didiba.

³⁶ Ba lapileng a ba ahisa ho yona, ba thea motse oo ba ka ahang ho wona.

³⁷ Ba jala masimong, ba lema morara, kotulo ya eba kgolo.

³⁸ A ba hlohonolofatsa, ba ngatafala haholo, a ba atisetsa leruo la diphoofolo.

³⁹ Empa jwale ba qepha, ba kokobetswa, ka baka la ho imelwa ke ditsietsi le mahlomola.

⁴⁰ A theolela nyediso ho mahosana, a a sollisa lehwatateng moo ho seng tsela.

⁴¹ Empa a ntsha mafutsana bohlophehing ba wona, a atisa malapa a wona jwaloka mohlape.

⁴² Ba pelo di ntle ba bona hoo, mme ba thaba, empa ba kgopo bona ba thijwa melomo.

⁴³ Mang le mang ya bohlale a ke a ele tsena hloko, a ke a utlwisise ketso tsa mohau, mohau wa Morena.