Dipesaleme 106 - BIBELE

Ho se tshepahale ha setjhaba sa Iseraele

¹ Haleluja! Bokang Morena, hobane o molemo; mohau wa hae ke wa kamehla yohle.

² Ke mang ya ka bolelang ketso tse matla tsa Morena, ya ka tumisang thoriso yohle ya hae?

³ Ho lehlohonolo ba etsang toka, ba etsang ho lokileng ka nako tsohle.

⁴ Morena, ako nkgopole, ha o sitsa setjhaba sa hao, o nketele, o tlo mpholosa.

⁵ A nke ke bone katleho ya bakgethwa ba hao, ke be le kabelo thabong ya setjhaba sa hao, ke tle ke ithorise mmoho le bao e leng lefa la hao.

⁶ Rona le bo-ntata rona re entse dibe, re molato, re kgopo.

⁷ Bo-ntata rona, ha ba sa le Egepeta, ha ba a ka ba utlwisisa dimakatso tsa hao; ba ile ba lebala mohau wa hao o moholo, ba mpa ba fetohela Ya Hodimodimo ha ba le Lewatleng la Sufe.

⁸ Empa o ile a ba pholosa ka baka la lebitso la hae, hore ho tle ho bonahatswe matla a hae.

⁹ A kgalemela Lewatle la Sufe, yaba le a psha; a ba tsamaisa madibeng jwalokaha eka ke sebataolong.

¹⁰ A ba pholosa matsohong a ba ba hloileng, a ba namolela matsohong a sera.

¹¹ Metsi a kwahela ba ba lwantshang, ha se ke ha phonyoha le ya mong.

¹² Yaba ba qala ho kgolwa tshepiso tsa hae, ba mminela dithoko.

¹³ Empa ba phakisa ho lebala, ho lebala diketso tsa hae, ba tlohela ho batla keletso ho yena.

¹⁴ Ba mpa ba laolwa ke ditakatso tsa bona lefeelleng, ba leka Modimo ba le lehwatateng.

¹⁵ A ba nea seo ba neng ba se kopa, athe o tla ba neella ka lefu le ba timetsang.

¹⁶ Ba honohela Moshe ba le diahelong, le yena Arone, mohalaledi wa Modimo.

¹⁷ Lefatshe la ahlama, la metsa Datane, la kwenya sehlopha sa Abirame.

¹⁸ Mollo wa tuka hara sehlopha sa bona, malakabe a wona a tjhesa bao ba kgopo.

¹⁹ Ha ba le Horebe, ba ipopela namane, ba kgumamela setshwantsho se bopilweng ka kgauta.

²⁰ Ba lahla tlotla ya Modimo, ba tlotlisa setshwantsho sa pohwana, ntho e jang jwang.

²¹ Ba lebala Modimo, mopholosi wa bona, ya entseng tse kgolo Egepeta,

²² dimakatso naheng ya Kama, le tse tshosang Lewatleng la Sufe.

²³ Yaba o re o a ba fedisa, empa Moshe, mokgethwa wa hae, a kena dipakeng, a phoka bohale ba hae hore bo se ba timetse.

²⁴ Ba nyedisa naha e kgahlehang, hobane ba ne ba sa kgolwe, ba sa kgolwe ditshepiso tsa hae.

²⁵ Ba dumaduma ba le ditenteng tsa bona, ba se ke ba mamela lentswe la Morena.

²⁶ A phahamisa letsoho, a ba hlapanyetsa hore o tla ba bolaela lehwatateng,

²⁷ a qhalanye tloholo tsa bona, a di qhalanyetse hara ditjhaba, a di qhalanyetse dinaheng.

²⁸ Ba kgomarela Baale wa Peore, ba eja mahlabelo a etseditsweng bafu.

²⁹ Ba phephetsa Modimo ka diketso tsa bona, ba welwa ke lefu la sewa.

³⁰ Empa Finease a ema, a ahlola ba molato, yaba lefu la sewa le a fela.

³¹ Hoo a ho ballwa e le ho loka, ho isa melokong yohle, kamehla le mehla.

³² Ba boela ba halefisa Morena, ba mo halefisa metsing a Meriba, Moshe a ba tsietsing ka baka la bona;

³³ ba kgopisa moya wa hae, hoo a bileng a bua a sa inahana.

³⁴ Ha ba a ka ba timetsa ditjhaba jwalokaha Morena a ne a ba laetse;

³⁵ ba mpa ba nyallana le baditjhaba, ba ithuta mekgwa ya bona.

³⁶ Ba sebeletsa medimo ya bona, medimo ya bona ya ditshwantsho, e ileng ya ba fetohela leraba.

³⁷ Ba etsetsa bademona mahlabelo, ka bara le baradi ba bona.

³⁸ Ba tsholla madi a se nang molato, madi a bara le baradi ba bona, ba ba etsa mahlabelo a medimo, medimo ya ditshwantsho ya Kanana: Naha ya silafala ke madi.

³⁹ Ba itshilafatsa ka mesebetsi eo ya bona, ka ketso tseo tsa bona ba kwenehela Morena.

⁴⁰ Morena a halefela setjhaba sa hae, a nyonya bao e leng lefa la hae.

⁴¹ A ba neela matsohong a baditjhaba, ba buswe ke ba ba hloileng.

⁴² Dira tsa bona tsa ba hatella, ba ba katlasa taolo ya tsona.

⁴³ A nna a ba lopolla ka makgetlokgetlo, ba mpa ba ikgethela ho mo tella, ba tetebela bokgopong ba bona.

⁴⁴ Jwale a tadima ho tshwenyeha ha bona, ha a utlwa sello sa bona.

⁴⁵ A hopola selekane sa hae le bona, a ba hauhela ka baka la rato la hae le leholo.

⁴⁶ A etsa hore bohle ba neng ba ba isitse bothopuweng ba ba utlwele bohloko.

⁴⁷ Morena Modimo wa rona, ako re pholose; o re phuthe, o re ntshe ditjhabeng, re tle re boke lebitso la hao, lebitso la hao le halalelang, re o rorise re le motlotlo.

⁴⁸ Ho bokwe Morena, Modimo wa Iseraele, a bokwe kamehla yohle, e se nang qaleho le qetello. Setjhaba sohle se ke se re: “A ho be jwalo!” Haleluja!