Dipesaleme 103 - BIBELE

Lerato la Modimo

¹ Pesalema ya Davida. Boka Morena, wena moya wa ka; botho bohle ba ka bo boke bitso la hae le halalelang.

² Boka Morena, wena moya wa ka; o se ke wa lebala melemo yohle ya hae.

³ Ke yena ya o tshwarelang melato ya hao kaofela, ke yena ya o fodisang mahlokong a hao kaofela.

⁴ Ke yena ya o lopollang lebitleng, ke yena ya o qhakang ka mohau, ya o qhakang le ka lerato.

⁵ Ke yena ya o fepang tse molemo bophelong bohle ba hao, hore o boele o ntjhafale, o ntjhafale jwaloka ntsu.

⁶ Morena o sebetsa ka ho loka, o ahlolela bohle ba hateletsweng.

⁷ O ne a tsebise Moshe ditsela tsa hae, a bontsha bana ba Iseraele diketso tsa hae tse kgolo.

⁸ Morena o na le kutlwelobohloko, Morena o mosa; o dieha ho halefa, o tletse mohau.

⁹ Ha a re tsekise hoyahoile; ha a re jare ka pelo kamehla yohle.

¹⁰ Ha a re otle ho ya ka dibe tsa rona, ha a re putse ho ya ka melato ya rona.

¹¹ Jwalokaha mahodimo a phahametse lefatshe, le mohau wa Modimo o moholo, o moholo hakaalo ho ba mo tshabang.

¹² Jwalokaha botjhabela bo le hole le bophirimela, le ditlolo tsa rona o a di suthisa, o di suthisetsa hole le yena hakaalo.

¹³ Jwalokaha ntata bana a ba utlwela bohloko, ka mokgwa o jwalo le Morena o utlwela ba mo tshabang bohloko.

¹⁴ Ke hobane yena o tseba seo re bopilweng ka sona, ha a lebale hore re lerole feela.

¹⁵ Ditshiu tsa motho di tshwana le tsa jwang; o tlokoma jwaloka palesa ya naha;

¹⁶ ha moya o foka hodima yona e a fela, ebe ditulo tsa yona di sala di le feela.

¹⁷ Empa mohau wa Morena, ho ba mo tshabang, ke wa kamehla yohle, e se nang qaleho le qetello; le ho loka ha hae ho fihla le ditlohotloholwaneng tsa bona,

¹⁸ ho ba bolokang selekane sa hae, ba hopolang ho phethahatsa ditaelo tsa hae.

¹⁹ Morena o beile terone ya hae, o e beile mahodimong, tsohle di tlasa puso ya hae.

²⁰ Bokang Morena, lona mangeloi a hae, lona bahale ba phethang taelo tsa hae, ba mamelang seo a se bolelang.

²¹ Bokang Morena, lona mabotho a hae wohle, lona basebeletsi ba hae ba phethang thato ya hae.

²² Bokang Morena, lona mesebetsi ya hae yohle, hohle moo a busang teng. Boka Morena, wena moya wa ka.